Bankomattyń tehnıkalyq qateligin paıdalanǵan 38 reseılik qyrýar somany alyp ketken
ASTANA. QazAqparat - Omby oblysyndaǵy Kalachınsk qalasynyń 38 turǵyny bankomattaǵy aqaýdy paıdalanyp, 2,5 mln-ǵa jýyq rýbldi zańsyz ıelengeni úshin sot aldynda jaýapqa tartylýy múmkin. Jergilikti turǵyndardyń bireýi ǵana óz erkimen bankke aqshany qaıtardy, qazir oǵan qatysty qylmystyq qýdalaý toqtatyldy, dep habarlady reseılik tass.ru agenttigi.
«Omby jelilik polıtsııa basqarmasynda qylmystyq ister tergelip, Omby oblysynyń turǵyndaryna qatysty tergeý aldyndaǵy birqatar tekserister ótkizilýde», - delingen habarlamada.
Eske sala ketsek, Kalachınsk stansasyndaǵy temirjol vokzalynda ornatylǵan bankomat belgisiz sebeptermen nomınaly bir myń rýbldiń ornyna besmyńdyq kýpıýralar bere bastaǵan. Osyny paıdalanǵan turǵyndar bankomattan qyrýar qarjyny alyp ketip, óz kerekterine jaratqan.
