Bankomattan 13 mln. teńgeni urlap ketken aqtóbelik kommýnaldyq qyzmetter úshin qaryzyn japqan
ASTANA. 12 jeltoqsan. QazAqparat - Aqtóbe qalasynda krımınaldyq polıtsııa qyzmetkerleri izdestirý sharalaryn júrgizý kezinde bankomattan iri kólemde aqsha urlaǵan qalanyń eki turǵynyn ustady.
Bul jaıynda QR ІІM baspasóz qyzmetinen habarlady.
Belgili bolǵandaı, jeltoqsan aıynyń basynda polıtsııaǵa ekinshi deńgeıdegi banktiń qaýipsizdik qyzmetiniń bastyǵy saýda úıiniń ishinde ornalasqan bankomattan 13 mln. teńge aqsha urlanǵany týraly shaǵymdanǵan. Oqıǵa ornyn tekserý kezinde kúdiktilerdiń dúkenniń syrt jaǵynan terezeni buzyp kirip, súımenmen jáne avtokólik kiltiniń kómegimen bankomatty buzyp, odan 13 mln. teńgeden astam aqshasy bar 4 kassetany urlap ketkeni anyqtaldy.
«Dúkende kúzetshi men beıne baqylaýdyń joq ekeni anyqtaldy, dabyl qaǵý júıesi ortalyq pýnktke qosylmaǵan. Bankomat urlyq jasalǵanǵa deıin bir kún buryn aqshamen toltyrylǵan. Qylmysty ashý úshin ІІD barlyq jeke quramy jumyldyryldy. Birneshe kúnnen keıin kúdiktiler quryqtaldy, olardyń 45 jáne 23 jastaǵy jumys istemeıtin oblys turǵyndary ekeni anyqtaldy»,-delingen ІІM málimetterinde.
Ustaý kezinde olardan aqsha saqtaıtyn konteıner men 513 myń teńge aqsha tárkilendi. Kúdiktilerdiń bireýi aqshany jumsap ta úlgergen, ıaǵnı 2 mln. teńge qaryzyn berip, kommýnaldyq qyzmet qaryzyna 250 myń teńge tólegen. Qalǵan aqshany ózara bólisip alǵan. Kúdiktiler quryqtaldy. Tergeý jalǵasýda.
