Bankomat janyndaǵy baqylaý: Petropavlda jańa algorıtm alaıaqtardyń josparyn buzdy

PETROPAVL. KAZINFORM — Petropavl qalasynda ınternet-alaıaqtyqtyń jolyn kesýge baǵyttalǵan jańa algorıtm tıimdiligin kórsetti. Jańa tásildiń arqasynda bir apta ishinde 7 mıllıon teńgeden astam qarajat alaıaqtardyń qolyna túspeı qaldy, dep habarlaıdy Polisia.kz.

Soltústik Qazaqstan oblysynda jyl basynan beri 270-ten astam ınternet-alaıaqtyq faktisi tirkelip, bul óńirdegi barlyq qylmystyń tórtten birin qurap otyr.

Polıtsııa departamenti basshylyǵynyń bastamasymen Petropavldaǵy saýda-oıyn-saýyq ortalyqtarynda polıtsııa men jekemenshik kúzet qyzmetkerleri birlesip kezekshilik atqaryp, bankomat mańyndaǵy jaǵdaıdy baqylaýda ustaıdy. Ásirese, telefonmen sóılesip, abdyraǵan kúıde aqsha aýdarmaq bolǵan egde jastaǵy azamattarǵa erekshe nazar aýdarylady.

Alaıaqtardyń jıi qoldanatyn ádisteri: «Sizdiń atyńyzǵa nesıe rásimdeldi» nemese «Anashym, men jol apatyna tústim» degen jeleýmen aqsha talap etý.

Mysaly, tártip saqshylary 74 jastaǵy zeınetkerdi bankomat janynda baıqap qalyp, ony alaıaqtan qutqaryp qaldy. Áıelge ózin bank qyzmetkeri retinde tanystyrǵan adam atyna nesıe rásimdelgenin aıtyp, 500 myń teńgeni «qaýipsiz shotqa» aýdarýdy suraǵan. Ýaqytyly aralasýdyń arqasynda bul áreketke tosqaýyl qoıyldy.

Dál osyndaı jaǵdaıda 75 jastaǵy taǵy bir turǵyn da alaıaqqa aqsha aýdarýǵa oqtalǵan. Qyraǵylyq tanytqan kúzetshi men polıtsııanyń jedel áreketi onyń da qarajatyn saqtap qalýǵa sep boldy.

Úshinshi oqıǵada zeınetker erli-zaıypty 6 mıllıon teńgesinen aıyrylyp qala jazdady. Olar 1,5 mıllıon teńgeni aýdaryp úlgergenimen, polıtsııa qyzmetkerleriniń túsindirý jumysy nátıjesinde qalǵan 4,5 mıllıon teńgeni aman alyp qaldy.

SQO PD bastyǵynyń birinshi orynbasary Asqar Muhametqalıevtiń aıtýynsha, bul algorıtm óz tıimdiligin dáleldep otyr. Bolashaqta ony jetildirý, keńeıtý jáne úzdik qyzmetkerlerdi yntalandyrý josparlanǵan.

Polıtsııa azamattardy zeınet jasyndaǵy týystary men tanystaryna alaıaqtyq ádisterin túsindirip, bankomat aldynda jalǵyz qaldyrmaýǵa shaqyrady. Kúmándi jaǵdaıda bankpen nemese «102» nómirine qońyraý shalý qajettigi eskertiledi.

Aıta keteıik, Oralda 13 adamǵa 6,5 mln teńge zalal keltirgen alaıaq ustaldy.