Bankomat arqyly qolma-qol aqsha alatyn azamattarǵa qatysty derekter bazasy qurylmaıdy – Ulttyq bank
ASTANA. KAZINFORM – Jalǵan aqparatqa qarsy is-qımyl ortalyǵy memleket tarapynan bank termınaldary (bankomattar) arqyly qolma-qol aqsha alatyn azamattardyń derekter bazasy quryldy degen aqparatty joqqa shyǵardy.
Ortalyqtyń málimetinshe, bul derek manıpýlıatıvti sıpatqa ıe jáne shyndyqqa janaspaıdy. Sonymen qatar Ulttyq bank elimizde bankomattar arqyly qolma-qol aqsha alý faktileri boıynsha eshqandaı tizilimder nemese derekter bazasy qalyptastyrylmaıtynyn atap ótti.
- Qaýipsizdikti qamtamasyz etý maqsatynda bankomattarda beınebaqylaý kameralary ornatylǵan. Olar alaıaqtyq pen urlyqtyń aldyn alýǵa, sondaı-aq klıentterdiń jáne yqtımal quqyq buzýshylardyń áreketterin tirkeý arqyly oqıǵalardy tergep-tekserý barysynda paıdalanýǵa múmkindik beredi. Beınejazbalar daýly jaǵdaılar men quqyqbuzýshylyqtar kezinde dálel retinde qyzmet etip, bank klıentteri men qarjy uıymdarynyń múddelerin qorǵaýǵa baǵyttalǵan, - delingen habarlamada.
Bul talaptar Qazaqstan Respýblıkasy Ulttyq banki basqarmasynyń 2016 jylǵy 31 tamyzdaǵy №205 qaýlysymen bekitilgen. Atalǵan qaýlyǵa sáıkes, bankter bankomattarda tólem kartochkasyn ustaýshynyń bet-júzin tirkeýge múmkindik beretin keminde bir beınekamera ornatýǵa mindetti. Al 2026 jylǵy 1 qańtardan bastap bankter beıneaqparatty keminde 180 kúntizbelik kún saqtaý talaptaryn oryndaýǵa tıis.
Aıta keteıik, qoldanystaǵy zańnamada bankomattar arqyly qolma-qol aqsha alatyn tulǵalardy alý jıiligine nemese somasyna qaramastan tirkeý jóninde ózge talaptar kózdelmegen.
Osyǵan baılanysty Jalǵan aqparatqa qarsy is-qımyl ortalyǵy kontent jasaýshylardy quqyqtyq normalardy burmalap túsindirýden jáne qoǵamda negizsiz alańdaýshylyq týdyratyn aqparatty taratýdan bas tartýǵa shaqyrdy. Qosymsha suraqtar týyndaǵan jaǵdaıda, azamattar ýákiletti memlekettik organdarǵa «eOtinish» aqparattyq júıesi arqyly resmı saýal joldaı alady.
Eske sala keteıik, QR Prezıdenti janyndaǵy Ortalyq kommýnıkatsııalar qyzmeti qurylymynda 2025 jyly Jalǵan aqparatqa qarsy kúres jónindegi ortalyq iske qosyldy. Osy oraıda «Kazahstanskaıa pravda» gazetine bergen suhbatynda bul ortalyq jaıynda OKQ dırektory Asqar Omarov baıandap bergen edi.