Banknotalar aınalymǵa shyqpas buryn qandaı synaqtan ótedi
ASTANA. KAZINFORM — Qazaqstan Ulttyq bankiniń mamandary banknotalardyń kúndelikti qoldanysta kezdesetin túrli áserlerge qanshalyqty tózimdi ekenin arnaıy synaqtar arqyly tekseredi.
Bank ókilderiniń aıtýynsha, synaq barysynda banknota qaǵazy men qorǵanysh elementteri lastaný, ylǵal, temperatýra ózgerisi jáne mehanıkalyq áserge tózimdiligi boıynsha baǵalanady.
— Mamandar banknotalardy kúndelikti qoldanysta kezdesýi múmkin túrli jaǵdaılarǵa synaıdy. Máselen, synaq barysynda banknotalar sýǵa jáne jýǵysh zattarǵa salynyp, ártúrli temperatýra jaǵdaıynda synaqtan ótkiziledi. Osylaısha olardyń kir jýǵysh mashınada jýylǵannan keıingi kúıi men beriktigi tekseriledi, — dedi Ulttyq bank ókilderi.
Aldymen mamandar kúndelikti ómirde banknotaǵa juǵýy múmkin kir men daqtardyń qasıetin qaıtalaıtyn arnaıy qospa ázirleıdi. Osydan keıin qaǵazdyń bastapqy sıpattamasy zerttelip, banknotalar aınalym kezinde bolatyn áserlerdi ımıtatsııalaıtyn arnaıy qurylǵyǵa ornalastyrylady.
— Synaq aıaqtalǵan soń banknota qaǵazynyń jaı-kúıi qaıta qaralyp, qorǵanysh elementteriniń saqtalýy men qaǵazdyń sapasy baǵalanady. Sondaı-aq banknotalardyń beriktigi, ıkemdiligi jáne uzaq ýaqyt paıdalanýǵa tózimdiligi de tekseriledi. Osyndaı zertteýlerdiń arqasynda zamanaýı tehnologııalar engizilip, aınalym barysynda sapasyn, senimdiligin jáne qorǵanysh qasıetterin saqtaıtyn banknotalar ázirlenedi, — dep atap ótti Ulttyq bank ókilderi.
Aıta ketelik banknot fabrıkasynan eksklıýzıvti reportaj jasaǵan edik.
