Bankke baspanasyn berýge májbúr bolǵan aqtóbelik jetimder ákimdikten kúder úzdi
AQTÓBE. QazAqparat - Aqtóbede anasy qaza bolǵan soń baspanasynan aıyrylǵan Sarqulovtar áýletiniń tórt balasy qazir jaldamaly páterde júr. Aqtóbe oblysynyń ákimi Berdibek Saparbaevtan kómek suraǵan jetimderge oblystyq qarjy basqarmasynan resmı jaýap keldi, dep habarlaıdy QazAqparat tilshisi.
Aqtóbe qalasynda turatyn Sarqulovtar otbasyndaǵy jaǵdaıdy buǵan deıin habarlaǵan edik . Qazirgi ýaqytta 4 jetim bala jergilikti janashyrlardyń kómegimen páter jaldap otyr. Taıaýda ǵana Aqtóbe oblystyq qarjy basqarmasynan resmı jaýap keldi.
«Aqtóbe oblysynyń ákimi Berdibek Saparbaevtyń qabyldaýynda bolǵan kezde banktegi qaryzdy qaıtarýǵa kómektesý týraly aıtqan bolatynsyz... Jeke adamnyń ekinshi deńgeıli bank aldyndaǵy qaryzyn bıýdjet esebinen tóleý QR Zańnamasynda qarastyrylmaǵanyn habarlaımyz. Eger ekinshi deńgeıli banktiń sheshimimen kelispeseńiz sotqa júginýge quqyǵyńyz bar»,- dep jazylǵan oblystyq qarjy basqarmasynyń basshysy G. Súıintaeva jaýap bergen hatta.
Aqtóbe oblysynyń ákimi Berdibek Saparbaevtyń qabyldaýynda bolyp, óz ótinishin bildirgen úıdiń úlkeni Abaı Jumabaev qazir kimnen kómek surap, qaıda bararyn bilmeı otyr.
«Biz anamyzdan qalǵan úıge murager bolýdan bas tarttyq. Sot úkimi áli zańdy kúshine engen joq. Al oblystyq qarjy basqarmasynan bes kún buryn ǵana jaýap keldi. Hatty oqyp, qarapaıym ǵana keńes berilgenin kórdim. Men oblys ákimi Berdibek Saparbaevtyń qabyldaýynda bolyp, oǵan úmitpen kelip otyrǵanymdy jetkizdim. Ol muragerlikten bas tartyp, turǵyn úı kezegine turý kerek ekenin aıtty. Kezdesý kezinde bank aldyndaǵy qaryzdy óteý týraly emes, baspana máselesin sheshýdi oılaǵan edim. «Aǵa, sońǵy úmitim sizde, barar jerim joq, osy máseleni qarastyryp berseńiz jaqsy bolar edi» dedim. «Seni túsinemin, kómektesemin» dedi. Biraq kómek kórgen joqpyn. Kezdesýden soń habaryn ber dep qabyldaý bólmesiniń telefonyn berdi. Telefon shalyp, qaıta baılanysa almadym. Qazir kúder úzip otyrmyn»,- dedi Abaı Jumabaev.
Aıta keteıik, Sarqulovtar otbasynyń kenjesi Mergen Sarqulovty aǵasy Álisher Sarqulov óz qamqorlyǵyna alatyn boldy. Qujat rásimdelgen soń Sarqulovtar páter kezegine tura alady.
«Qolǵanat Aqtóbe» qaıyrymdylyq qory bizge habarlasyp, páterge qajetti tósenish, ydys-aıaq ákelip berdi. Qarapaıym adamdar banktegi esepshotyma aqsha aýdarǵan eken. Olarǵa alǵys aıtamyn. 300 myń teńge jınalypty. Ony alyp, depozıtke saldym. Sebebi, erteń ne bolatynyn bilmeımiz. Óz qamymyzdy ózimiz oılaýymyz kerek. Bizge páter jaldap bergen Álııa apa da kómek kórsetetinin aıtqan. Bári belgisiz kúıinde qalyp tur», - dedi Abaı Jumabaev. Aldaǵy ýaqytta Álıhan Sarqulov Aqtóbe tehnıkalyq kolledjiniń syrttaı bóliminde oqýyn jalǵastyratyn boldy. Álisher Sarqulov ta bilim alady. Al úıdiń kenjesi Mergen Sarqulov №56 orta mektepke aýystyryldy. Qazaqstandyqtar anasynan aıyrylyp, ákesinen baz keshken balalarǵa kómektese alady.
Abaı Sarqulovtyń tel nómiri: +7 (702) 963-16-79
4402573539623324 Halyq bank
Jumabaev Abaı Myrzaǵalıuly
INN 950802351844
