Bankaralyq QR-kod júıesi kóp uzamaı iske qosylady — Tımýr Súleımenov
ASTANA. KAZINFORM — Qazaqstanda biryńǵaı bankaralyq QR-kod júıesi bıyl shilde aıynan bastap iske qosylyp, barlyq bankter úshin mindetti bolady. Bul týraly Ulttyq bank tóraǵasy Tımýr Súleımenov brıfıngte málim etti.
Onyń aıtýynsha, qazirgi ýaqytta elimizdegi barlyq ekinshi deńgeıli bankter biryńǵaı QR-kod júıesine qosylǵan. Ulttyq bank maýsym aıynda banktermen birlesip barlyq tehnıkalyq jumystardy aıaqtaýdy josparlap otyr. Nátıjesinde qazaqstandyqtar jańa qyzmetti shilde aıynan bastap paıdalana alady.
— Osy aptada bizdiń komanda banktermen birqatar kezdesýler ótkizip, tehnıkalyq jumystar júrgizdi. Jazǵa qaraı bul júıeni tolyq iske qosyp, halyqqa qoljetimdi etemiz dep úmittenemiz. Taǵy da qaıtalap óteıin, barlyq quqyqtyq máseleler rettelip, zańnan bastap, biryńǵaı júıege qosylý týraly kelisimderge deıin barlyǵy bekitildi. Endi tek tehnıkalyq máseleler qaldy. Jazda ony is júzinde iske asyramyz dep senemiz, — dedi ol.
Sonymen qatar onyń sózinshe, ekinshi deńgeıli bankter júıege qosylý týraly kelisimderge qol qoıǵan. Al 19 shildeden bastap zań normalary kúshine enip, bankter úshin bul júıege qatysý mindetti bolady.
Ulttyq bank tóraǵasy bul júıeni engizýde qaýipsizdik máselesine erekshe nazar aýdarylyp otyrǵanyn atap ótti.
— Árıne, men de bul protsestiń tezirek júzege asqanyn qalaımyn. Bul, árıne, krıptografııa, tsıfr, ony tereń túsinip, tólemderdiń qaýipsizdigin qamtamasyz etý qajet. Sebebi bul ártúrli bankter arasyndaǵy júıe. Aqparat almasý kezinde jeke derekter, tólem týraly málimetter, tóleýshige qatysty aqparat beriledi. Olardyń barlyǵy tolyq qorǵalýy tıis. Áıtpese, jaqsy oılastyrylǵan jobanyń ornyna máseleler týyndaýy múmkin, — dep túıindedi Tımýr Súleımenov.
Sonymen qatar osy brıfıngte vedomstvo basshysy Ulttyq banktiń bazalyq mólsherlemeni birtindep tómendetýi múmkin ekenin atap ótti.
