Bankaralyq aýdarymdar lımıti eki eselenýi múmkin
ASTANA. KAZINFORM — Elimizde telefon arqyly bankaralyq aýdarymdardyń bazalyq lımıti bir tranzaktsııa úshin 500 myńnan 1 mln teńgege deıin ulǵaıtylýy múmkin. Bul týraly Ulttyq bank tóraǵasynyń orynbasary Bınur Jálenov aıtty.
— Bizdiń ortaq táýekelderdi basqarý júıemiz aıasynda belgilenetin bazalyq lımıtter bar. Qazirgi tańda biz normatıvtik-quqyqtyq aktiniń jobasyn «Ashyq NQA» portalyna talqylaýǵa shyǵardyq. Eger barlyq rásimder maquldansa, onda qazan aıyna qaraı bul júıe tolyq iske qosylady. Biz bir tranzaktsııaǵa belgilengen lımıtti 500 myń teńgeden 1 mıllıon teńgege deıin arttyrdyq, — dedi Ulttyq bank tóraǵasynyń orynbasary Bınur Úkimet otyrysynan keıingi baspasóz máslıhatynda.
Sonymen qatar ol bankter ózderiniń táýekel saıasaty aıasynda aýdarymdarǵa jeke shekteýler belgileı alatynyn atap ótti. Lımıtter bir operatsııaǵa nemese belgili bir ýaqyt aralyǵyna belgilenýi múmkin. Budan bólek, keıbir jaǵdaılarda klıentter bank mobıldi qosymshasy arqyly shekteýlerdi ózderi de belgileı alady.
Osy jyldyń shilde aıynda 115 myńǵa jýyq azamat mobıldik aýdarymdar erejelerin buzýǵa baılanysty habarlama alǵan edi.
