Bank júıesindegi senimsiz nesıelerdiń kólemi 19 mlrd. dollardy qurap otyr - «Ernst & Young» kompanııasynyń aǵa menedjeri
ALMATY. Maýsymnyń 14-i. QazAqparat /Erlik Erjanuly/ - Senimsiz nesıelermen jumysta memlekettiń alar orny óte zor.
Bul jaıly búgin Almatyda AQSh pen Qazaqstan arasyndaǵy memlekettik jáne jeke ekonomıkalyq áriptestik qurý bastamasy aıasynda banktik jáne qarjylyq reformalar týraly dóńgelek ústel jıynynda aıtyldy.
«Maýsymnyń 2-si kúni biz senimsiz nesıeler týraly dóńgelek ústel májilisin ótkizdik. Oǵan bılik oryndarynyń, «Samuryq-Qazyna» ulttyq ál- aýqat qorynyń, bankterdiń, ınvestorlardyń ókilderi jáne keńesshiler men zańgerler qatysty. QR Qarjy naryǵy men qarjy uıymdaryn retteý jáne qadaǵalaý agenttiginiń sáýir aıyndaǵy málimetteri boıynsha Senimsiz nesıeler 19 mıllıard dollardy qurady. Bul 2009 jylǵy jalpy ishki ónimniń 18 paıyzyna teń. Senimsiz nesıelerdiń kólemi jaǵynan 11,5 mıllıard dollarmen BTA bank kósh bastap keledi», deıdi «Ernst & Young» kompanııasynyń aǵa menedjeri Nemat Hananbaev. Onyń aıtýynsha, qata qurylymdaý úderisi kezinde dóńgelek ústelge qatysýshylardyń keıbiriniń pikirinshe, senimsiz nesıeler kólemi 30 mıllıard dollarǵa deıin ulǵaıady. Bul odan da joǵary bolýy múmkin. Óıtkeni qaıta qurylymdaý resmı túrde 3 bankte ǵana júzege asyrylýda. Sondyqtan senimsiz nesıe máselesin sheshý úshin bul dóńgelek ústel jıyny kezinde qatysýshylar úkimetke óz usynystaryn jasamaq.
