Bank júıesindegi aqaý: qostanaılyq kásipker bankten 400 mıllıon teńgeden astam qarajatty jymqyrǵan
Qostanaı oblysynyń polıtsııa departamenti habarlaǵandaı, qostanaılyq kásipker bank júıesindegi aqaýdy paıdalanyp, 416 mıllıon teńgeni ıemdenip ketken.
«55 jastaǵy kásipker dosynan paıdalaný úshin bank kartasyn alyp, kartanyń shotyna 500 myń teńge salǵan. Bul somany taýardy tóleýge aýdarǵannan keıin ol kartada taǵy osyndaı kólemdegi aqsha paıda bolǵanyn biledi. Sonymen eki kún ishinde kásipkerge 416 mıllıon teńgeden astam qarjy túsken. Belgili bolǵandaı, bankte júıe isten shyqqan. Sonda da pysyq qostanaılyq esh saspaǵan. Ol aqshany eldegi tanystary men dostarynyń kartasyna aýdara bastaǵan, osylaısha olar aýdarylǵan aqshany alyp, ózine qaıtaryp alady. Er adam kartamen másele týyndaýyna baılanysty olarǵa aqsha sheshe almaıtynyn aıtyp túsindirgen»,- dedi departamentte.
Qostanaı qalasy PB jedel ýákilderi polıtsııa maıory Denıs Kononenko aǵa leıtenant jedel izdestirý sharalary barysynda ınternet urysyn anyqtap, ustady. Tergeýshiler Dana Malınına men Aıagóz Tólegenova qylmystyq isti sapaly túrde tergep júrgizýde.
Nátıjesinde sot úkimimen qostanaılyq jeti jylǵa bas bostandyǵynan aıyryldy.
Sol banktiń basshylyǵy ishki ister mınıstri Erlan Turǵymbaevtyń atyna alǵys hat joldaǵan.
«Qostanaı oblysy polıtsııa departamenti qyzmetkerleriniń kásibı is-áreketteriniń arqasynda 416 mln teńgeden astam somadaǵy bank qarajatyn jymqyrý faktisi jedel tergeldi. Qylmystyq is sotqa jiberildi. Polıtseıler tergeýdiń zamanaýı ádisterin ıgergen, bul – azamattardyń quqyqtaryn qaýip-qaterlerdiń jańa túrlerinen qorǵaýdyń mańyzdy kepili», - dedi bank qyzmetkerleri.
