Bank júıesinde qalyptasyp otyrǵan kúrdeli máselelerdiń biri - problemaly kredıtter - M. Baısynov
ALMATY. 2 aqpan. QazAqparat /Erlik Erjanuly/ - «Qarjy sektoryndaǵy ahýal turaqty. Byltyr kóptegen sharalar jasalyndy.
Eger máseleli kredıtter jaıy sheshilip jatatyn bolsa, bank júıesi qalypty óz damýyna qaraı qadam jasaıtyn bolady». Bul týraly QR Qarjy naryǵyn jáne qarjy uıymdaryn retteý men qadaǵalaý agenttigi tóraǵasynyń orynbasary Murat Baısynov Almatyda Agenttiktiń 2010 jylǵy jumystarynyń qorytyndysyna arnalǵan baspasóz máslıhatynda aıtty.
«Aldaǵy ýaqytta bankterdiń problemaly aktıvterin tazalaýda, ıaǵnı qalypqa keltirýde túrli qadamdar jasalady. Bankter problemaly aktıvterdi beretin kompanııalardy qurady. Sonymen birge zaemshylardyń jaǵdaıyn jaqsartýǵa baǵyttalǵan zań jobasy qabyldanady. Ipotekalyq nesıe alýshylar men ınvestorlardyń quqyn qorǵaıtyn bul zań jobasy Elbasyna qol qoıýǵa berildi», - deıdi Murat Baısynuly.
Onyń sózine qaraǵanda, zań jobasy qabyldanǵan jaǵdaıda banktik zaem sharty boıynsha ósimpuldyq mólsher osyndaı sharttyq qoldanysynyń ár jylǵy zaem somasynyń 10 paıyzdan joǵary bolmaıdy. Kepil berýshiniń jazbasha bas tartýy bolǵan jaǵdaıda kepilde turǵan múlik sottan tys satylmaıdy.
M. Baısynovtyń aıtýynsha, zań jobasynda Ulttyq bank QR Qarjy naryǵyn jáne qarjy uıymdaryn retteý men qadaǵalaý agenttiginiń kelisimimen normatıvtik quqyqtyq akt qabyldaıdy. Ol boıynsha bankter kredıtke onda kórsetilgen kólemnen artyq ústeme qoıa almaıdy.
