Bank júıesi men qarjy salasyndaǵy qazaq tiliniń qoldanylýy óte tómen - Mádenıet mınıstri
ASTANA. 9 qarasha. QazAqparat /Aıdar Ospanalıev/ - «Bank búkil bıznesti qımylǵa, qozǵalysqa keltiretin qurylymdar. Banksiz, qarjy júıesinsiz eshqandaı da bıznes damymaıdy. Alaıda osy bank júıesi men qarjy salasyndaǵy qazaq tiliniń qoldanylýy óte tómen»,- dedi búgin Bnews.kz portaly arqyly ótken on-laın konferentsııa barysynda turǵyndardyń saýaldaryna jaýap bergen Mádenıet mınıstri Muhtar Qul-Muhammed.
Onyń aıtýynsha, elimizge shet memleketterden kelgen oralmandar bankpen baılanysty qandaı da bir sharalardy júzege asyrý úshin qarjy júıesine nemese osy bankterge keletin bolsa, onda otyrǵan qyzmetkerler oralman aǵaıyndarǵa nanymdy jaýap ta bere almaıdy. Sebebi onda otyrǵandar qazaq tilin óte nashar biledi. Olardyń arasynda ana tilin múldem bilmeıtin azamattar da bar. «Qazaqta bıtke ókpelep, tonyńdy órteme», degen qanatty sóz bar.
Bizge bank bolsyn nemese qarjy júıesinde otyrǵan azamattardyń qazaqsha bilmeıtindigine, onyń shala saýattylyǵyna nemese mineziniń dórekiligine bola ana tilimizden jerinýge, ókpeleýge bolmaıdy. Degenmen Qazaqstannyń árbir azamaty osy eldegi qandaı da bir mekemege kelgen soń ózine qajetti másele jóninde qazaq tilinde suraq qoıyp, sol tilde jaýap alýǵa quqy bar. Bul másele árıne elimizde birden sheshilip kete qoıǵan joq. Alaıda burnaǵy jyldarmen salystyrǵanda munda aıtarlyqtaı jetistikter bar», -dedi mınıstr.
Onyń aıtýynsha, Tilderdi qoldaný men damytýdyń 2011-2020 jyldarǵa arnalǵan memlekettik baǵdarlamasynda memlekettik tildi bala baqshalar men oqý oryndarynda ǵana emes, sonymen birge qoǵamdyq ómirdiń barlyq salasyn qamtıtyn qyzmetterde qazaq tilin eń quryǵanda belgili bir deńgeıde nemese aldyna kelgen adamǵa qazaq tilinde qyzmet kórsete alatyndaı jaǵdaıda meńgertý qajettigi kórsetilgen. ıAǵnı, atalmysh baǵdarlamaǵa sáıkes, eldegi mamandyqtardyń belgili bir tizbesi jasalýy kerek. Ol tizbede kórsetilgen mamandyq ıeleri belgili bir deńgeıde memlekettik tildi bilýge mindetti bolýy tıis. Al bul istiń qalaı júzege asý qajettigi biz atap ótken baǵdarlamada tolyq qamtylatyn bolady»,- dedi M.Qul-Muhammed.
