Bank týraly zań jobasynan ıslam ıpotekasyna jol ashatyn norma túsip qalǵan — Lázzat Ibragımova

ASTANA. KAZINFORM — Bankter týraly jáne Bank qyzmeti týraly zańdardyń jobasynan ıslam sharttarymen turǵyn úıge aqsha jınaý týraly norma túsip qalǵan. Bul týraly «Otbasy bank» aktsıonerlik qoǵamynyń basqarma tóraıymy Lázzat Ibragımova Májilistiń qoǵamdyq palata otyrysynda aıtty.

— Keıingi eki aptada áleýmettik jelide chellendj júrip jatyr. Onda jas qyzdar, jas áıelder «Otbasy bankke» ótinish joldap jatyr. Osyǵan deıin Májilis qabyrǵasynda birneshe ret 2026 jyly ıslam ıpotekasyn bastaımyz dep ýáde bergen edik. Bul — óte úlken suranys. Ásirese din ustanatyn jastar qaýymynan suranys joǵary, — deıdi ol.

«Otbasy bank» basshysy halyqtyń osy suranysyna baǵyttalǵan normany bank týraly jańa zańdardyń jobasyna qaıta qosýǵa kúsh salatynyn aıtty.

— Ókinishke qaraı, bankter týraly jáne Bank qyzmeti týraly zań jobalary Májiliske kirgen kezde turǵyn úı jınaqtaryn ıslam erejelerimen qarjylandyrýǵa múmkindik berý týraly norma bolǵan. Biraq Májilisten shyqqanda sol norma joǵalyp ketti. Qazir osy másele boıynsha Senatqa júginbekshimiz, — dedi Lázzat Ibragımova.

Aqyry qoǵamdyq palata ókilderi bul normanyń máselesin arnaıy jumys tobynda taǵy pysyqtaý kerek degen toqtamǵa keldi. 

Buǵan deıin Qazaqstanda keıbir bankterdiń janynan sharıǵatqa sáıkestik jónindegi keńester qurylatynyn jazǵan edik.