Bank shotyn esirtki satýshylarǵa ádeıi bergen adamdarǵa qylmystyq is qozǵaldy

ASTANA. KAZINFORM –  «Zań men tártip» qaǵıdaty aıasynda ІІM ınternettegi esirtki qylmystaryn jáne olardy qarjylandyrýdyń aldyn alyp jatyr, – dep jazdy Polisia.kz.

Bıyl 16 qyrkúıekten bastap óz bank shotyńyzdy bógde adamdardyń qylmystyq maqsatta paıdalanýyna ruqsat bergeni, ıaǵnı dropperlik úshin qylmystyq jaýapkershilik engizildi. Bul ózgeris QR Qylmystyq kodeksiniń 232-1-babynda qarastyrylǵan.

Jańa norma kúshine engennen beri el boıynsha bank shotyn esirtki satýshylarǵa syıaqy úshin ádeıi bergen adamdarǵa qatysty 10 qylmystyq is tirkeldi.

Oral qalasynda 18 jastaǵy jigit óz tólem kartasyn qylmystyq topqa berip, olar ony eki aı boıy esirtki satýmen baılanysty qarjylyq operatsııalar úshin paıdalanǵan. Kúdikti ustalyp, kinásin moıyndady.

Sondaı-aq Semeıde 23 jastaǵy turǵyn óz bank kartasyn úsh aı boıy esirtki satýdan túsken aqshany shyǵarýǵa qoldanýǵa ruqsat etken. Atyraý oblysynda da 21 jastaǵy qyz óz kartasyna 400-den astam aqsha aýdarymyn jasaýǵa ruqsat etken. Qarjy esirtki saýdasynan túsken.

Esirtki qylmysyna qarsy is-qımyl komıteti osyndaı qylmystar úshin 200 aılyq eseptik kórsetkish mólsherindegi aıyppuldan 7 jylǵa deıin bas bostandyǵynan aıyrý jazasy qarastyrylatynyn eskertedi.

- Óz bank rekvızıtterińizdi bógde adamdarǵa eshqashan bermeńiz, tipti aqsha úshin de. Bul sizdiń taǵdyryńyzǵa balta shabýy múmkin, - delingen habarlamada.

Aıta keteıik, Jetisý oblysynda azamattardyń atyna 40 mln teńge nesıe rásimdegen alaıaq sottaldy.