Bank shotyn bógde adamǵa syıaqy úshin bergen jetisýlyq zań aldynda jaýap berdi
ASTANA. KAZINFORM — Jetisýda bank shotyna qoljetimdilikti zańsyz berý faktisi boıynsha sot úkimi shyǵaryldy, dep habarlaıdy oblystyq prokýratýranyń baspasóz qyzmeti.
Jetisý oblysynda ınternet-alaıaqtyqtyń aldyn alý jáne azamattardyń bank derekterin úshinshi tulǵalarǵa berý derekterin azaıtý baǵytynda quqyq qorǵaý organdary júıeli jumys júrgizip jatyr.
Tekeli qalalyq soty qala turǵynyna qatysty qylmystyq isti qarap, ony QR Qylmystyq kodeksiniń 232-1-baby 1-bóligi boıynsha kináli dep tanydy. Ol óz bank shotyna qoljetimdilikti materıaldyq syıaqy úshin úshinshi tulǵaǵa zańsyz bergen.
— Sot materıaldaryna sáıkes, azamat bank qosymshasy arqyly shot derekterin bógde adamǵa bergen. Keıin bul shot ınternet-alaıaqtyq shemasy aıasynda jábirlenýshiniń qarajatyn aýdarý úshin paıdalanylǵan. Sot aıyptalýshyǵa aıyppul túrinde jaza taǵaıyndady. Úkim zańdy kúshine engen joq, — delingen vedomstvo taratqan aqparatta.
Jetisý oblysynyń prokýratýrasy mundaı áreketter qylmystyq jaýaptylyqqa ákep soǵatynyn eskertip otyr. Vedomstvonyń málimetinshe, bank kartalaryn, shottardy, logın-parolderdi jáne SMS-kodtardy úshinshi tulǵalarǵa berý — zańǵa qaıshy áreket bolyp sanalady, tipti shot ıesi qarajattyń keıingi zańsyz paıdalanylýynan beıhabar bolsa da jaýapkershilik týyndaıdy.
Mamandardyń aıtýynsha, alaıaqtar jıi «jeńil tabys» ýáde etip, azamattardyń bank shottaryn nemese kartalaryn «jalǵa berý» usynystaryn qoldanady. Alaıda mundaı shottar zańsyz qarjy aınalymyna jáne dropperlik shemalardy júzege asyrýǵa paıdalanylady.
Quzyrly organdar azamattardy qarjylyq qaýipsizdik erejelerin qatań saqtaýǵa, bank derekterin eshkimge bermeýge jáne kúmándi usynystar týraly quqyq qorǵaý organdaryna dereý habarlaýǵa shaqyrdy.
Budan buryn bank shotyn esirtki satýshylarǵa ádeıi bergen adamdarǵa qylmystyq is qozǵalǵanyn jazǵan edik.
