Bank sektoryndaǵy depozıtterdiń jalpy kólemi 12 trln. 97 mlrd. teńgeni qurady - Q.Kelimbetov
ASTANA. QazAqparat - Banktik sektordyń jıyntyq aktıvteri 13,5 paıyzǵa artty. Bul týraly búgin Ortalyq kommýnıkatstıalar qyzmetindegi brıfıngte QR Ulttyq bankiniń tóraǵasy Qaırat Kelimbetov málim etti.
«2014 jyldyń qyrkúıeginde aqsha massasy ósip, 13 trln. 466 mlrd. teńgeni qurady. Bul kórsetkish jyl basynan beri 16 paıyzǵa ósip otyr», - dedi Q. Kelimbetov.
Onyń sózine qaraǵanda, banktik sektordyń jıyntyq aktıvteri 13,5 paıyzǵa artyp, 17 trln. 542 mlrd. teńgeni qurady.
1 qazandaǵy jaǵdaı boıynsha banktik sektordyń ssýdalyq qorjyn 14 trln. 452 mlrd. teńgeni qamtydy nemese jyl basynan beri 8,3 paıyzǵa artty.
«Depozıtterdiń jalpy kólemi 12 trln. 97 mlrd. teńgeni qurady. Bıyldyń basynan beri onyń deńgeıi 20 paıyzǵa jýyq mólsherde ósti», - dedi Ulttyq bank basshysy.
