Bank sektory men oıyn bıznesine joǵary korporatıvtik tabys salyǵy engizilmek
ASTANA. KAZINFORM – Bank sektory men oıyn bıznesine joǵary korporatıvtik tabys salyǵy engizilmek. Bul týraly búgin Májiliste jańa Salyq kodeksiniń jobasyn tanystyrǵan Ulttyq ekonomıka vıtse-mınıstri Azamat Ámrın aıtty.
«Memleket basshysy sondaı-aq ekonomıkanyń túrli sektorlaryndaǵy saralanǵan salyq mólsherlemelerine kóshý qajettigin atap ótti. Zertteý nátıjeleri boıynsha korporatıvtik tabys salyǵynyń mólsherlemesin saralaý usynylady. 20 paıyz bazalyq mólsherleme saqtalady. Bank sektory men oıyn bıznesi úshin 25 paıyz joǵary mólsherleme belgilenedi. Bul rette, eger bankter ekonomıkanyń naqty sektoryn kredıtteıtin bolsa, onda mundaı kirister boıynsha 20 paıyz bazalyq mólsherleme qoldanylatyn bolady. 10 paıyz deńgeıindegi mólsherleme óz ónimderin óndirý úshin, sondaı-aq qarjy lızıngi men áleýmettik salaǵa úshin usynylady. Olar: bilim berý, medıtsına jáne densaýlyq saqtaý», - dedi ol.
Bul rette vıtse-mınıstr áleýmettik sala úshin óz aktsıonerleri men quryltaıshylaryna dıvıdendter tóleýge ruqsat berý usynylatynyn aıtady.
«Aýyl sharýashylyǵy taýaryn óndirýshiler úshin 3 paıyz deńgeıindegi mólsherleme saqtalady», - dedi Azamat Ámrın.
