Bank salymshylarynyń barlyq qarajaty saqtaýly tur – Qarjy naryǵyn retteý agenttigi

NUR-SULTAN. QazAqparat – Qazirgi ýaqytta bank salymshylary úshin esh qaýip-qater joq jáne bank klıentteriniń barlyq qarajaty tolyq saqtaýly tur. Bul týraly QR Qarjy naryǵyn retteý jáne damytý agenttigi Qarjylyq qyzmetterdi tutynýshylardyń quqyqtaryn qorǵaý departamentiniń dırektory Aleksandr Terentev aıtyp berdi, dep habarlaıdy QazAqparat.

«Prezıdenttiń kapıtaldy elden zańsyz shyǵarýdy qadaǵalaý jáne jolyn kesý tapsyrmasyn oryndaý aıasynda Ulttyq banktiń, Qarjy naryǵyn retteý agenttiginiń jáne Qarjy monıtorıngi agenttiginiń halyqaralyq tólemder men aqsha aýdarymdaryn baqylaýdy kúsheıtý jónindegi birlesken buıryǵy qabyldandy. Osy mehanızm sheńberinde biz árbir operatsııadaǵy kúdik belgileri bar-joǵyn tekseremiz. Qazirgi ýaqytta bank salymshylary úshin esh qaýip-qater joqtyǵyn jáne bank klıentteriniń barlyq qarajaty tolyq saqtaýly turǵanyn basa aıtqym keledi», - dedi Aleksandr Terentev Ortalyq kommýnıkatsııalar qyzmetinde ótken baspasóz máslıhatynda.

Spıkerdiń aıtýynsha, «Bank qupııasy týraly» zańǵa sáıkes, jumys tolyq kólemde júrgizilgennen keıin ǵana egjeı-tegjeıli aqparat beriledi.