Bank operatorlaryna klıentterdiń derekter bazasy jabylady

NUR-SULTAN. QazAqparat – Qazaqstanda kelisim bazasy jasaldy. Endi sonyń arqasynda Halyqqa qyzmet kórsetý ortalyqtary men bankterdiń operatorlaryna klıenttiń jeke derekteri sms-kod arqyly rastaý jiberilgennen keıin ǵana qoljetimdi bolady. Bul týraly QR QR Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın aıtty, dep habarlaıdy QazAqparat tilshisi.

«Qazirgi ýaqyt derekter dáýiri. Bizdiń derekterimizdi alý úshin HQKO-nyń nemese banktiń operatory bolý qajet. Jáne de olarda qol jetkize alatyn derekterdiń sany óte kóp. Mundaı jappaı qoljetimdilik bolmaýy úshin kelisim bazasyn jasaqtadyq. Ol degenimiz ne? Burynyraqta adam bankke kelgen kezde oǵan ómir boıy derbes derekterin óńdeýge kelisim berý týraly kishkentaı áriptermen jazylǵan qaǵazdy tyqpalaıtyn. Eshkim ony nazar aýdaryp oqyǵan da joq, qol qoıyp bere salatyn. Qujat muraǵatqa ketetin. Endigi ýaqytta mundaı kelisimderdiń bárin tsıfrlyq túrde rásimdeletindeı jáne bazamyzǵa túsetindeı qylyp jasadyq», - dedi mınıstr Aqtóbe oblysy jurtshylyǵymen kezdesý barysynda.

Onyń atap ótýinshe, búginde mundaı ádis mamandandyrylǵan Halyqqa qyzmet kórsetý ortalyqtarynda qoldanylyp júr. Operator klıentke qyzmet kórsetpesten buryn onyń telefon nómirin suraıdy jáne sol nómirge sms-kod keledi. Kod engizilgennen keıin ǵana operator derbes derektermen jumysyn bastaı alady.

«Bul protsesti kúrdelendirý úshin emes, bizdiń derekterimizdi qorǵaý úshin jasaldy», - dedi Baǵdat Mýsın.