Bank ombýdsmeni: Shaǵymdardyń 95%-y — tutynýshylyq kredıtke qatysty

ASTANA. Kazinform — Bank ombýdsmenderiniń quzyreti keńeıtilgeli beri tirkelgen shaǵymdardyń kópshiligi tutynýshylyq kredıtterge qatysty. Bul týraly ombýdsmen Darhan Nurpeıisov aıtty. 

— Statıstıkaǵa úńilsek, 2024 jylǵy 23 jeltoqsannan 2025 jylǵy 20 qańtarǵa deıin 18 jumys kúniniń ishinde 960 ótinish túsip, onyń 550-i tirkeldi. Onyń 95 paıyzy tutynýshylyq nesıelerden týyndaǵan kelispeýshilikterge baılanysty. Jańa jylǵa deıin shaǵymdar kóp bolmady, negizinen 6 qańtardan bastap túse bastady. Osy qysqa merzimde osynsha adam habarlasyp otyr. Endi bir aı ishinde biz bul shaǵymdardy qarap, sheshim shyǵarýymyz kerek, — dedi ol OKQ alańynda. 

Spıkerdiń aıtýynsha, tirkelgen 550 shaǵymnyń birazy áli jumysqa alynbaǵan.

— Zańǵa sáıkes ombýdsmenge júginer aldynda qaryz alýshy bankke barýǵa mindetti. ıAǵnı bankke nemese kollektorlyq agenttikke barǵanyn dáleldeıtin qujattary bolýy tıis. Shaǵymdanǵandardyń kóbinde ondaı dálelder bolmady. Sondyqtan biz olarǵa keńes berip, bank nemese kollektorlyq uıymǵa qaıtadan jiberdik. «Solarmen kezdesip, óz usynystaryńyzdy berińiz, sodan keıin bank ombýdsmanyna kelýge quqyńyz bar» dedik, — deıdi Darhan Nurpeıisov. 

Eske salsaq, buryn bank ombýdsmeniniń ókilettigi tek ıpotekalyq qaryzdar, ıaǵnı kepilmen qamtamasyz etilgen banktik qaryzdar boıynsha kelispeýshilikterdi sheshýmen shekteldi. 2024 jylǵy 21 jeltoqsannan bastap quzyreti keńeıtilip, banktik qaryzdardyń barlyq túrleri boıynsha shaǵymdardy qaraıtyn boldy. 

Aıta keteıik, buǵan deıin ombýdsman kredıtin óteı almaıtyn jaǵdaıǵa tap bolǵan adam ne isteýi keregin aıtqan bolatyn.