Bank ombýdsmenine qalaı júginýge bolady
ASTANA. KAZINFORM — Eger nesıe boıynsha bankpen kelispeýshilik týyndap, olardy ózara sheshe almasańyz, bank ombýdsmenine júginýge bolady. Ol qaryz alýshylar men bankterge ózara ymyraǵa kelýge kómektesetin deldal retinde áreket etedi. Bul týraly Qarjy naryǵyn retteý jáne damytý agenttigi málim etti.
Ombýdsmenniń qyzmetteri – tegin. Onyń basty maqsaty – taraptar arasyndaǵy ózara tıimdi sheshimge qol jetkizý.
Bank ombýdsmenine qandaı jaǵdaıda júginý kerek?
Bank ombýdsmeni qaryz shartynyń talaptaryn ózgertýge, bereshekti qaıta qurylymdaýǵa jáne banktik qaryz sharty boıynsha mindettemelerdi oryndaýǵa baılanysty daýlardy qaraıdy.
Alaıda oǵan kelesi jaǵdaılarda júginýge bolmaıdy:
- is sotta qaralyp jatyr nemese sot sheshimi shyqqan;
- banktik uıymǵa júgingenin rastaıtyn dálelder bolmasa;
- jańa mán-jaılarsyz qaıtalanǵan ótinishter;
- ótinishti zańdy tulǵa nemese ókilettigi joq úshinshi tulǵalar berse;
- mıkroqarjy uıymdaryndaǵy (MQU) qaryzdar boıynsha (bul jaǵdaıda mıkroqarjylyq ombýdsmanǵa júginý qajet);
- másele alaıaqtyq áreketterge baılanysty bolsa.
Bank ombýdsmenine júginý úshin qandaı qujattar qajet?
Qaryz alýshy kelesi qujattardy usynýy tıis:
- banktik qaryz sharty men tólem kestesi;
- shartqa qosymsha kelisimder (bar bolsa);
- banktik uıymǵa jiberilgen ótinishtiń kóshirmesi jáne onyń jaýaby (nemese jaýaptyń bolmaýyn rastaıtyn qujat);
- qarjylyq jaǵdaıdyń nasharlaǵanyn rastaıtyn qujattar.
Ótinish qalaı qaralady?
Qujattardy qabyldaǵannan keıin, bank ombýdsmeni máseleni taldap, eki tarapqa da tıimdi sheshim usynady.
Eger qaryz alýshy bankpen qaıta qurylymdaý týraly kelisimge kele almasa, ombýdsman onyń qarjylyq jaǵdaıyna sáıkes keletin sharttardy usyna alady.
Bank ombýdsmeniniń sheshimderi qarjy uıymdary úshin mindetti. Eger qaryz alýshy sheshimge qanaǵattanbasa, Qarjy naryǵyn retteý jáne damytý agenttigine júginýge quqyly.
Bank ombýdsmenine qalaı júginýge bolady?
Ombdýsmanǵa kelesi tásilder arqyly habarlasýǵa bolady:
- resmı saıt arqyly: bank-ombudsman.kz;
- elektrondyq poshta arqyly: office@bank-ombudsman.kz;
- jeke kezdesý: Almaty qalasy, Aımanov kóshesi, 124, 301-keńse, Golden Time BO;
- telefon arqyly: +7 771 929 33 33.
Ózge de aqparattarmen Fingramota.kz saıtynan tanysýǵa bolady.
Eske sala keteıik, buǵan deıin Qazaqstanda biryńǵaı qarjy ombýdsmeni ofısi qurylatynyn jazǵan edik.
Al búgin Qarjy agenttigi borysh júktemesin azaıtýǵa baǵyttalǵan jańa qaýly jobasyn usyndy.