Bank ombýdsmany búkil kredıtter boıynsha daý-janjaldy retteýge mindetti bolady – zań jobasy
ASTANA. KAZINFORM – Bank ombýdsmany azamattardyń barlyq kredıtteri boıynsha daýlardy retteýge mindeti bolmaq. Bul týraly Májilistiń jalpy otyrysynda kredıt berý kezinde táýekelderdi azaıtýǵa jáne qaryz alýshylardyń quqyqtaryn qorǵaýǵa arnalǵan zań jobasy týraly baıandaǵan depýtat Únzıla Shapaq aıtty.
«Kredıt boıynsha merzimi ótken bereshekti sotqa deıin retteý sheńberinde azamattardyń quqyqtaryn qorǵaýdy kúsheıtiledi. Sońǵy jyldary tutynýshylyq kredıt berýdiń ósýi aıasynda Májilis depýtattarynyń jáne memlekettik organdardyń atyna problemalyq bereshek deńgeıin tómendetýge kómek kórsetý jóninde azamattardan kóptegen ótinishter kelip túsýde», — dedi depýtat.
Onyń atap ótýinshe, bank ombýdsmany problemalyq kredıtterdi, ásirese, tutynýshylyq kredıtterdi sotqa deıin retteý aıasynda qaryz alýshylardyń quqyǵyn qorǵaýǵa is júzinde qatyspaıdy.
Óıtkeni onyń ókilettigi ıpotekalyq qaryz daýlaryn qaraýmen shekteledi.
«Osyǵan baılanysty, zań jobasynda bank ombýdsmanynyń azamattardyń barlyq kredıtteri boıynsha daýlardy retteý mindeti engiziletin bolady. Sondaı-aq, bankter, mıkroqarjy uıymdary jáne kollektorlar úshin bank ombdýsmanynyń sheshimderin oryndaý mindettiligi engiziledi», — dedi Únzıla Shapaq.
