Bank of America bankine rekordtyq 1,2 mlrd dollar aıyppul salyndy
ASTANA. KAZINFORM — AQSh Qarjy mınıstrligi seısenbi kúni aqshany zańsyz aınalymǵa engizýge qarsy kúres talaptary men sanktsııalyq zańnamany buzǵany úshin Bank of America bankin 1,2 mıllıard dollar kóleminde aıyppul tóleýge mindettedi. Bul týraly Kazinform agenttiginiń Vashıngtondaǵy menshikti tilshisi NBC News arnasyna silteme jasap habarlaıdy.
AQSh Qarjy mınıstrliginiń málimetinshe, Bank of America bank qupııasy týraly zańdy qasaqana buzǵanyn jáne zań talaptaryna saı aqshany zańsyz aınalymǵa qarsy kúres sharalaryn qamtamasyz etpegenin moıyndaǵan. Sondaı-aq bank kúdikti qarjylyq operatsııalar týraly zań boıynsha mindetti esepterdi tapsyrmaǵanyn da rastaǵan.
— Bank of America jalpy somasy 5 mıllıard dollardan asatyn kúdikti qarjylyq operatsııalar týraly Qarjylyq qylmystarmen kúres jelisine (FinCEN) ýaqtyly habarlamaǵan. Onyń 1 mıllıard dollardan astamy ulttyq qaýipsizdikke qater tóndiretin jáne zańsyz qarjylandyrýǵa qatysty joǵary táýekeldi operatsııalarǵa tıesili. Olardyń qatarynda aqshany zańsyz jolmen zańdastyrý, alaıaqtyq jáne AQSh-tyń ońtústik-batys shekarasymen tyǵyz baılanysty saýda operatsııalary arqyly zańsyz kiristerdi zańdastyrý belgileri bar, — delingen AQSh Qarjy mınıstrliginiń málimdemesinde.
FinCEN — búkil álem boıynsha aqshany zańsyz jolmen zańdastyrýǵa, zańsyz qarjylyq qyzmetke jáne terrorıstik jelilerdi qarjylandyrýǵa qarsy kúresetin AQSh-tyń Qarjylyq qylmystarmen kúres jelisi.
Bank of America — AQSh-taǵy aktıvter kólemi boıynsha ekinshi iri bank. Qarjy mekemesi 70 mıllıonnan astam klıentke qyzmet kórsetip, jyl saıyn shamamen 4,5 trıllıon dollar kólemindegi tólem operatsııalaryn óńdeıdi.
Budan bólek bank korporatıvtik klıentterdiń jalaqy aýdarymdary, korporatıvtik nesıe kartalary boıynsha tólemder jáne jetkizýshilermen esep aıyrysý sekildi jalpy somasy 450 trıllıon dollar bolatyn qarjylyq operatsııalardy júzege asyrady.
— Búgingi sharalar eń iri qarjy uıymdarynyń da zań talaptaryna baǵynýǵa mindetti ekenin aıqyn kórsetedi, — dedi AQSh Qarjy mınıstri Skott Bessent.
— Qarjylyq qylmystarǵa qarsy kúres talaptaryn saqtaý — asa mańyzdy másele. Biz bul baǵyttaǵy jumystardyń talapqa saı júrgizilýine jaýaptymyz. Federaldyq jáne jergilikti quqyq qorǵaý organdaryna myńdaǵan tergeý júrgizýge qoldaý kórsetýdi jalǵastyryp, jyl saıyn júzdegen myń kúdikti operatsııa týraly habarlamany usynyp otyramyz, — delingen Bank of America bankiniń NBC News arnasyna bergen málimdemesinde.
Buǵan deıin AQSh prezıdenti Donald Tramptyń JPMorgan Chase bankin sotqa berip, odan 5 mıllıard dollar ótemaqy talap etkeni habarlanǵan bolatyn.
https://kaz.inform.kz/news/tramp-jpmorgan-chase-bankn-sotka-berp-5-milliard-dollar-talap-ett-f8725d/
