Bank lıtsenzııasynan aıyrylsa, salymshylar ne isteýi kerek
QDKBQ qandaı qarjy quraldaryna kepildik beredi?
Qor kepildikteri jeke tulǵalardyń barlyq otandyq bankterdegi jáne (ıslam bankteri men olardyń fılıaldaryn qospaǵanda) sheteldik bankterdiń fılıaldarynda ornalasqan depozıtterine, olardyń ishinde aǵymdaǵy jáne kartochkalyq shottardaǵy aqshalaryna qoldanylady.
Bank lıtsenzııasynan aıyrylǵan jaǵdaıda QDKBQ onyń salymshylaryna kepildi ótem tóleıdi. Bul jerde salymnyń túri men valıýtasyna qaraı bekitilgen shekti kepildik mólsheri, sondaı-aq salymǵa eseptelgen syıaqy mólsherlemesi eskeriledi.
Maksımaldy kepildik mólsheri zańnama júzinde bekitilgen jáne onyń somasy salymnyń túri men valıýtasyna qaraı árqalaı bolyp keledi. Mysaly, teńgelik jınaq salym boıynsha kepildik mólsheri 20 mln teńgeden asyrylmaıdy. Bul taqyryp boıynsha tolyǵyraq myna aqparat kózinen tanysyp shyǵýǵa bolady.
Tólemder qashan bastalady?
Kepildi ótem bank lıtsenzııasynan aıyrylǵan kúnnen bastap, 35 jumys kúni ishinde tólenedi. Alaıda is júzinde budan da erte beriledi. Mysaly, 2020-2021 jyldardaǵy saqtandyrý jaǵdaılary boıynsha taratylyp jatqan «Tengri Bank», «Asia Credit Bank (AzııaKredıt Bank)» jáne «Capital Bank Kazakhstan» bankteriniń salymshylary ózderiniń qarajattaryna 6-8 jumys kúni ishinde qol jetkizdi.
Qor salymshylarǵa tólemniń bastalýy týraly aldyn ala habarlaıdy. Aıtalyq, zańnamaǵa sáıkes bank lıtsenzııasynan aıyrylǵan kúnnen bastap, 30 jumys kúni ishinde QDKBQ resmı baspasóz basylymdarynda habarlandyrý jarııalaıdy. Onda ótem tóleýdiń bastalý kúni, merzimi men ótem tóleý oryndary, osy tólemdi júzege asyratyn agent bankterdiń ataýy kórsetiledi. Bir mezgilde tıisti baspasóz habarlamasy QDKBQ, Qarjy naryǵyn retteý jáne damytý agenttigi jáne agent bankterdiń saıtarynda jarııalanady. Sondaı-aq atalmysh aqparat telearna jańalyqtarynda aıtylyp, ınternet jáne áleýmettik jelilerde taraıdy.
QDKBQ men agent bankter habarlandyrý jarııalanǵan kúnnen bastap, 5 jumys kúni ishinde ótinishter qabyldap, ótem tóleýdi júzege asyrady.
Salymshylar qandaı merzim ishinde kepildi ótemdi alýǵa ótinish bere alady?
Salymshy tólem bastalǵan kúnnen bastap, 1 jyl ishinde QDKBQ nemese agent bankke ótem alýǵa ótinishti jáne qajetti rastaýshy qujattardy bere alady. Olardy qaraý merzimi jáne ótem tóleý týraly sheshim qabyldaý 5 jumys kúninen asyrylmaıdy.
Atap ótý kerek, QDKBQ tólem merziminiń aıaqtalatyn kúni týraly buqaralyq aqparat quraldary jáne óziniń resmı saıty men áleýmettik jelilerdegi resmı paraqshalarynda tólem merzimi aıaqtalýǵa jarty jyl jáne 30 kún qalǵanda habarlaıdy.
Eger salymshy tólem merzimin ótkizip alsa, ne isteýi kerek?
Tólem merzimi aıaqtalǵan soń, QDKBQ salymshylardyń talap etpegen aqshalaryn olardyń Biryńǵaı jınaqtaýshy zeınetaqy qorynda (BJZQ) ashylǵan jeke zeınetaqy shottaryna erikti zeınetaqy jarnalary retinde aýdarady. Bul úderis salymshylardyń derektemelerin salystyryp, tekserý arqyly júzege asyrylady.
Eger salymshy tólem merzimin «dáleldi sebepter» boıynsha ótkizip alǵan bolsa, tipti onyń aqshasy BJZQ-ǵa aýdarylyp ketken kúnniń ózinde sol ótem aqshany alý jóninde Qorǵa jazbasha ótinishpen júgine alady.
Zańnamada dáleldi sebepterdiń mynadaı tizimi bekitilgen:
• áskerı qyzmetke kirý;
• Qazaqstan Respýblıkasynan tys jerde bolý;
• depozıtordyń murasyn qabyldaý jáne murany
ıemdenýge nemese ashýǵa baılanysty ózge de sebepter;
• bas bostandyǵynan aıyrý oryndarynda bolý;
• sot anyqtaǵan ózge de mán-jaılar.
Atalǵan kez kelgen sebep tıisti qujattarmen rastalýy tıis.
Atap ótý kerek, dáleldi sebepter boıynsha tólem alý jónindegi ótinish QDKBQ-ǵa myna merzim ishinde, ıaǵnı:
• bank túpkilikti taratylǵanǵa deıin;
• zeınetaqymen qamsyzdandyrý týraly zańnamaǵa
sáıkes BJZQ-da erikti zeınetaqy jarnalary esebinen
zeınetaqy tólemderin alý quqyǵy týyndaǵanǵa deıin berilýi tıis.
«Dáleldi sebepter» boıynsha ótem alýǵa ótinish berý týraly tolyqqandy aqparatty myna materıaldan oqyp shyǵýǵa bolady.
Depozıtter boıynsha kepildik berý jáne bank lıtsenzııasynan aıyrylǵan jaǵdaıda ótem tóleý tártibi týraly tolyqqandy maǵlumattarmen QDKBQ kdif.kz saıtynan tanysýǵa bolady, sondaı-aq soǵan qatysty suraqtardy info@kdif.kz poshtasyna, @kdif_ask telegram-chatyna joldaýǵa nemese 1460 tegin nómiri arqyly QDKBQ baılanys ortalyǵyna habarlasýǵa bolady.
