Bank qyzmetkerlerin kepilge alý: Nelikten Marat Ahmetjanov arnaýly operatsııany ózi basqardy
El turǵyndary ІІM basshysynyń formasy bolǵanyn, demalys kúni bolǵanyna qaramastan operatsııaǵa basshylyq jasap, óte kásibı turǵyda ózin kórsete bilgendigin atap ótýde. Degenmen syn da bar. Mınıstrdiń ózi aralasatyndaı jaǵdaı óte kúrdeli boldy ma? Álde elordada tájirıbeli kelissózshi jetispeı me?. Bul saýaldarǵa QazAqparat tilshisine eksklıýzıv suhbat bergen Іshki ister mınıstriniń birinshi orynbasary Marat Qojaev jaýap berdi, dep habarlaıdy QazAqparat tilshisi.
«Árıne joq, kelissózshi maman jetkilikti. Bizde arnaýly daıyndyqtan ótken kelissózshiler bar. Olar Ulttyq qaýipsizdik komıteti akademııasynyń antıterrorlyq ortalyǵynda oqýdan ótedi. Sol kúni de bizdiń arnaýly bólimsheniń osyndaı mamany qatysty. Ókinishke oraı, onyń tegin, atyn, ákesiniń atyn aıta almaımyn. Ol oqıǵa ornyna Іshki ister mınıstri kelgennen keıin ishke birneshe ret kirip, kelissóz júrgizdi. Mınıstrge qaskóıdiń talabyn baıandap, onyń is-áreketin, qolynda ne bar ekendigin aıtty», - dedi Marat Qojaev.
Onyń atap ótýinshe, mınıstr oqıǵa demalys kúni, túski ýaqytta oryn alǵanyn eskerip, sol jerge ózi de barý kerek dep sanaǵan. Ol oqıǵa ornyna kelip, operatsııaǵa ózi basshylyq jasap, kúsh qoldanýǵa nemese kelissózdi jalǵastyrýǵa qatysty sheshim qabyldaǵan. Operatsııa barysynda ІІM basshysy basqynshymen tikeleı sóılesip, tutqynǵa alynǵan bank qyzmetkerlerin bosatýǵa tyrysqan.
«Mınıstrdiń ol jerge ózi barýy jáne atalǵan operatsııaǵa basshylyq jasaýǵa qatysýy faktisin bylaı baǵalar edim. Kez kelgen polıtsııa shenine, laýazymyna, jaǵdaıyna qaramastan, demalys ne jumys kúni bolsa da qylmys jasalsa ári ol azamattardyń ómiri men densaýlyǵyna qaýip tóndirse, onda onyń jolyn kesýi tıis. Menińshe, mınıstr dál solaı oılap, oqıǵa ornyna bardy», - dedi Marat Qojaev.
Ol qylmyskerdi qolǵa túsirý úshin kúsh qoldaný týraly sheshimdi mınıstri jeke ózi qabyldaǵanyn atap ótedi.
«Árıne, eń aldymen jarylystan qoryqtyq. Óıtkeni, qylmysker jarylǵysh zat bar ekendigin jáne óz ómirin de, tutqyndardyń da ómirin qııýǵa daıyn ekendigin birden aıtty. Qysqa ǵana ýaqyttyń ishinde egjeı-tegjeıli aqparat jınap, qaýiptiń tómendigin, ony basqasha ymyraǵa keltirý jolynyń joqtyǵyn, munan ary kútý jaǵdaıdy kúrdelendire túsetindigin túsingennen keıin kúsh qoldaný týraly sheshim qabyldandy. Óıtkeni, tutqyndardyń qaskóıdiń qolynda bolǵan árbir mınýty óte aýyr edi. kórinetin jerde turǵan qyzdardyń kózderinen olardyń qatty úreıli ekendigin kórdik. Sondyqtan da mınıstr baıandamalardyń, saraptamalardyń negizinde kúsh qoldaný týraly sheshim qabyldady», - dedi mınıstrdiń birinshi orynbasary.
Onyń atap ótýinshe, osydan keıin ІІM basshysy kúsh qoldanýǵa buıryq berdi. Al qylmysker múldem kútpegen edi. Sanaýly sekýndtyń, 10-15 sekýndtyń ishinde búkil operatsııa sátti aıaqtaldy.
