Bank qyzmetkerlerin kepilge alǵan qarýly er adamǵa qandaı jaza qoldanylady
ASTANA. QazAqparat – Astanadaǵy bank ǵımaratynda qyzmetkerlerdi ustap otyrǵan qarýly kúdiktige qandaı jaza qarastyrylǵany belgili boldy, dep habarlaıdy QazAqparat Polisia.kz-ke silteme jasap.
Oqıǵa 18 maýsym kúni saǵat 13:51-de bolǵan edi. Dostyq kóshesiniń boıyndaǵy Kaspi bank fılıalyna kirgen belgisiz tulǵa tapanshaǵa uqsas zatpen qorqytyp 7 adamdy kepilge alǵan.
Kelissóz júrgizgennen keıin saǵat 16:35-te arnaıy jasaq qyzmetkerleri ǵımaratqa shabýyl jasady. Josparlanǵan operatsııanyń nátıjesinde 30 jastaǵy er adam ustalyp, kepilge alynǵandardyń barlyǵy bosatyldy. Kepilge alynǵandar men kepilge alýshy zardap shekken joq.
Atalǵan fakti sotqa deıingi tergeýdiń biryńǵaı tizimine QR QK 261 baby 2 bóligi «Adamdy kepilge alý» boıynsha tirkeldi. Bul bapta múlki tárkilenip nemese onsyz, jeti jyldan on eki jylǵa deıingi merzimge bas bostandyǵynan aıyrý jazasy qarastyrylǵan.
QR Qylmystyq-protsestik kodeksiniń 201-baby negizinde sotqa deıingi tergep-tekserýdiń ózge de derekteri jarııa etilmeıdi.
Buǵan deıin bank qyzmetkerlerin kepilge alǵan kúdiktige qatysty qylmystyq is qozǵalǵanyn jazǵan bolatynbyz.
