Bank qyzmetkerleri 150 lıtrge jýyq qan tapsyrdy
ALMATY. 1 qarasha. QazAqparat /Erlik Erjanuly/ - «Qazaqstan halyq banki» AQ-nyń 356 qyzmetkeri 150 lıtrge jýyq donorlyq qan tapsyrdy.
Bul shara «Qan tapsyryp, ómir syıla» dep atalatyn erikti qan tapsyrý aktsııasy aıasynda júzege asty. Aktsııa sheńberinde jınalǵan qan elimizdiń medıtsına mekemelerine onkologııalyq jáne gematologııalyq qaterli aýrýǵa shaldyqqan aýyr naýqastarǵa kómek retinde jiberildi.
Búgingi kúni elimiz boıynsha donorlar sany orta eseppen alǵanda 1 myń turǵynǵa shaqqanda 18 adamnan kelip otyr. Dúnıejúzilik densaýlyq saqtaý uıymynyń usynystaryna súıenetin bolsaq, qanǵa muqtaj naýqastardyń barlyǵyn qamtamasyz etý úshin qan qorynyń mundaı kórsetkishtik qatynasy 1 myń adamǵa 50 donordan bolý kerek. Mamandardyń aıtýynsha, mundaı nátıjege qol jetkizý úshin erikti túrde aqysyz qan tapsyrý qalypty qoǵamdyq normaǵa aınalýy qajet.
