Bank qyzmetkeri retinde habarlasqan – aqtóbelik 22 mln teńgesin alaıaqqa berip qoıdy
Aqtóbe oblystyq Polıtsııa departamenti turǵyndardy alaıaqtar jóninde eskertkenimen, kópshilik áli kúnge deıin qońyraý shalǵan beıtanys adamdarǵa senedi. Bul joly 60 jastaǵy aqtóbelik bar jıǵan-tergeninen aıyryldy.
«30 mamyr kúni beıtanys adam qońyraý shalyp, ózin bank qyzmetkerimin dep tanystyrǵan. Er adamǵa senip qalǵan aqtóbelik telefon nómirine kelgen sms habarlamany aıtyp, jınaq shotyndaǵy 22 mıllon teńgeden astam qarjysynan aıyryldy. Eger sizge banktiń qaýipsizdik qyzmetiniń qyzmetkerleri qońyraý shalyp, óz shotyńyzdy qaýipsizdendirý qyzmetin usynsa, senbeńiz. Eshqandaı operatsııany rastamańyz. Bank pen tólem júıeleri eshqashan habarlama jibermeıdi nemese klıentterden shot derekterin berýdi suramaıdy», - dedi oblystyq PD baspasóz qyzmetiniń jetekshisi Erbolat Sarqulov.
Aıta keteıik, jyl basynan beri polıtsııaǵa alaıaqqa aldanǵandardan 400 aryz tústi.
Buǵan deıin Nur-Sultan qalasynda ınternet alaıaqtarynan 1 mlrd teńge shyǵyn kelgenin habarlaǵan edik. Polıtsııanyń málimetinshe, atalǵan kezeńde 48 ınternet-alaıaq ustalyp, qylmystyq jaýapkershilikke tartylǵan. Mysaly, olardyń biri ınternet jelisinde 60-tan astam alaıaqtyq jasaǵan.
