Bank qaıtys bolǵan adamnyń týystarynan nesıeni óteýdi talap ete ala ma
ASTANA. KAZINFORM – Bank nemese mıkroqarjy uıymy qaıtys bolǵan adamnyń týystarynan tek týystyq baılanysy úshin nesıesin óteýdi talap ete almaıdy. Bul týraly Kazinform agenttiginiń resmı saýalyna Qarjy naryǵyn retteý jáne damytý agenttiginiń Syrtqy kommýnıkatsııalar basqarmasynyń basshysy – baspasóz hatshysy Oljas Ramazanov jaýap berdi.
Onyń aıtýynsha, bul máselede adamnyń marqumǵa kim bolyp keletini emes, murany qabyldap-qabyldamaýy mańyzdy.
– Bank nemese mıkroqarjylyq qyzmetti júzege asyratyn uıym qaıtys bolǵan qaryz alýshynyń týystarynan tek olardyń týystyq qatynastaryna baılanysty kredıtti óteýdi talap etýge quqy joq. Kredıtor qaryzdy óteý týraly talapty murany qabyldaǵannan keıin ǵana muragerge qoıa alady. Murany qabyldaý jáne ony zańda belgilengen tártippen rásimdeý osy jaǵdaıda mańyzdy. Bul rette muragerdiń jaýapkershiligi ózine qalǵan muranyń qunymen shekteledi. Osylaısha, ol marqumnyń qaryzyn óz qarajaty esebinen tolyq óteýge mindetti emes, - dedi spıker.
Sondaı-aq, aıta ketý kerek, zańnama basqa adamdarǵa qaıtys bolǵan qaryz alýshynyń bereshegin óz erkimen óteýge tyıym salmaıdy. Alaıda bul olardyń kredıtti tóleýge mindetti ekenin bildirmeıdi.
