Bank kartasynyń derekterin basqaǵa berý – qaýip qana emes, qylmys

SEMEI. KAZINFORM – Abaı oblysynyń polıtsııa qyzmetkerleri banktik kartany, shot derektemelerin nemese oǵan qoljetimdilikti basqa adamǵa berý - endi jaı ǵana qaýip emes, qylmystyq jaýapkershilik ekendigin eskertti.

Abaı oblysy Polıtsııa departamenti baspasóz qyzmetiniń málimetinshe, sotqa deıingi tergeý barysynda azamattardyń óz banktik kartasyn, karta derektemelerin nemese shotqa tolyq qoljetimdilikti aqshalaı syıaqy úshin nemese «ýaqytsha ǵana», «eshteńe bolmaıdy» degen oımen úshinshi tulǵalarǵa bergeni anyqtalyp jatyr. 

- Keıin mundaı shottar ınternet-alaıaqtyqtan túsken qarajatty aýdarý, qylmystyq jolmen alynǵan aqshany qolma-qol aqshaǵa aınaldyrý sııaqty zańsyz áreketterge paıdalanylady. Tergeý tájirıbesi kórsetkendeı, banktik derektemelerdi berýge kelisimniń ózi shotyńyzdyń ary qaraı qalaı qoldanylatynyn bilmeseńiz de qylmystyq jaýapkershilikten bosatpaıdy, - delingen aqparatta. 

QR QK-niń 232-1-babynda banktik shottarǵa, tólem quraldaryna jáne ózge de sáıkestendirý derekterine zańsyz qoljetimdilik bergeni úshin aıyppul salý nemese bas bostandyǵyn shekteý sııaqty jaza túrleri qarastyrylǵan. 

- Banktik karta - sizdiń jeke qarjylyq qaýipsizdigińiz. Ony basqa bireýdiń qolyna berý - óz erkińizben qylmystyq shemaǵa qatysý degen sóz. Sondyqtan azamattardy zań talaptaryn saqtaýǵa, banktik kartalaryn, derektemelerin jáne qoljetimdilikterin eshbir jaǵdaıda úshinshi tulǵalarǵa bermeýge shaqyramyz, - delingen málimette. 

Eske salsaq, osyǵan deıin byltyr 6 myńnan astam ınternet-alaıaqtyq qylmysy áshkerelengeni habarlanǵan.