Bank kapıtalynyń eń az mólsheri 10 mlrd teńgege deıin shektelmek
ASTANA. KAZINFORM – Bazalyq lıtsenzııasy bar bankterdi qadaǵalaý jáne olarǵa qoıylatyn prýdentsııalyq talaptar jeńildetilmek. Bul týraly Májilistiń jalpy otyrysynda Qarjy naryǵyn retteý jáne damytý agenttiginiń tóraǵasy Mádına Ábilqasymova aıtty.
- Sizderdiń qaraýlaryńyzǵa «Qazaqstan Respýblıkasyndaǵy bankter jáne bank qyzmeti týraly» jáne «Qazaqstan Respýblıkasynyń keıbir zańnamalyq aktilerine qarjy naryǵyn retteý jáne damytý máseleleri boıynsha ózgerister men tolyqtyrýlar engizý týraly» Qazaqstan Respýblıkasy Zańdarynyń jobalary usynylyp otyr. Zań jobalary Memleket basshysynyń 2024 jylǵy jáne 2025 jylǵy Joldaýlaryn iske asyrý maqsatynda ázirlendi. Bankter týraly jańa zańnyń qurylymy aıtarlyqtaı ózgertildi. Qoldanystaǵy normalarǵa revızııa jáne ońtaılandyrý júrgizildi. Bankterde korporatıvtik basqarý, is-qımyldy qadaǵalaý, tólemge qabiletsiz bankterdi retteý boıynsha jańa bólimder kózdeldi. Zań jobasy 9 bólimnen, 23 taraýdan jáne 135 baptan turady. Іlespe zań jobasynda 7 kodekske jáne 35 zańǵa túzetýler engiziledi, - dedi ol.
Onyń aıtýynsha, zań jobalarynda bank qyzmetin retteýdiń negizgi maqsaty retinde Qazaqstan Respýblıkasynyń bank júıesiniń qarjylyq turaqtylyǵyn qamtamasyz etý aıqyndalǵan.
Jańa zańda bank qyzmetin retteýdiń mynadaı mindetteri kózdelgen:
- - bank júıesiniń jumys isteýi úshin quqyqtyq negizderdi belgileý;
- - bank qyzmetine qatysty retteý, baqylaý jáne qadaǵalaý;
- - depozıtorlardyń, ózge de kredıtorlar men klıentterdiń quqyqtary men zańdy múddelerin qorǵaý;
- - banktik qyzmetter naryǵynda adal básekelestikti qamtamasyz etýge yqpal etý;
- - qarjylyq saýattylyq deńgeıin jáne halyq úshin bank qyzmetteriniń qoljetimdiligin arttyrýǵa yqpal etý.
Agenttik tóraǵasy eń aldymen bank qyzmetin tepe-teń retteýdi engizý kózdelip otyrǵanyn aıtty.
- Shoǵyrlanýdy tómendetý jáne básekelestikti damytý úshin bazalyq jáne ámbebap lıtsenzııalardy engizý arqyly bank qyzmetin lıtsenzııalaýǵa qoıylatyn talaptardy yryqtandyrý kózdeledi. Bul tásildiń maqsaty – iri bankterdiń ǵana emes, sol sııaqty naryqqa jańa qatysýshylardyń damýyn qamtamasyz etetin ornyqty ári básekeles ortany qalyptastyrý. Bazalyq lıtsenzııa ámbebap lıtsenzııadan ruqsat etilgen operatsııalar kólemi men retteýshilik talaptar deńgeıi boıynsha erekshelenedi, - dedi Mádına Ábilqasymova.
Vodomstvo basshysynyń atap ótýinshe, bazalyq banktik lıtsenzııasy bar bankter úshin zań jobasynda aktıvterdiń eń joǵary mólsheri men menshikti kapıtaldyń eń az mólsherine shekteýler belgilenedi.
- Bul rette naqty shekti mánder zańǵa táýeldi aktilerde aıqyndalady. Qazirgi kezeńde aktıvterdiń mólsherin 500 mlrd teńgege deıin jáne kapıtaldyń eń az mólsherin 10 mlrd teńgege deıin shekteý josparlanýda. Bazalyq lıtsenzııasy bar bankterdi qadaǵalaý jáne olarǵa qoıylatyn prýdentsııalyq talaptar jeńildetiledi. Jyl saıyn jasalatyn qadaǵalap baǵalaý protsesi jeńildetilgen túrde qoldanylady, ınspektsııalar júrgizý kezeńdiligi jáne beriletin eseptilik qysqartylady, - dedi ol.
Ótken jylǵy Joldaýda Prezıdent tsıfrlyq aktıvterdiń aınalymyn qamtamasyz etý jáne bank salasyna ınnovatsııalardy qaýipsizdik talabyna sáıkes engizý úshin ony retteıtin tetikterdiń turaqty bolýy mańyzdy ekenin aıtqan bolatyn.