Bank depozıtterinde qazaqstandyqtardyń 19,9 trln teńgesi saqtaýly
NUR-SULTAN. QazAqparat – Bank júıesindegi depozıtter 19,9 trln teńge boldy. Bul týraly QR Ulttyq bank tóraǵasy Erbolat Dosaev málim etti, dep habarlaıdy QazAqparat tilshisi.
«Bıylǵy maýsym aıynyń sońynda bank júıesindegi depozıtter teńgedegi salymdardyń ósýi esebinen jyl basynan beri 4,4 paıyzǵa nemese 846 mlrd teńgege ulǵaıyp, 19,9 trln teńge boldy», - dedi Ulttyq bank basshysy Úkimet otyrysynda.
Onyń sózine qaraǵanda, ulttyq valıýtadaǵy salymdar 11,9 trln teńgege deıin 10,2 paıyzǵa ósti. Valıýtalyq salymdar bıylǵy maýsym aıynyń sońynda 3,1 paıyzǵa (nemese 258 mlrd teńgege) azaıyp, 7,9 trln teńge boldy.
Nátıjesinde, depozıtterdiń dollarlaný deńgeıi osy jylǵy maýsym aıynda 40 paıyzǵa deıin tómendedi (2019 jylǵy jeltoqsanda 43,1%).
