Bank aldyndaǵy boryshy 2,1 mlrd teńgege jetken astanalyq turǵyn bankrottyq rásimdeı almaı júr

ASTANA. KAZINFORM – Memlekettik kirister komıteti tóraǵasynyń orynbasary Seıiljan Ahmetov jeke tulǵalardy bankrot dep taný sharalarynyń aralyq qorytyndylaryn baıandady.

- Almaty oblysynda eń kóp ótinish berilgen – 23 640 eń azy – Ulytaý oblysynda – 1 924. Bul osy aımaqtardaǵy halyqtyń tyǵyzdyǵyna baılanysty. Bankrottardyń ortasha jasy – 44 jas. Eń jasy úlken bankrot – 1943 jyly týǵan Shymkent qalasynyń turǵyny, bereshek somasy 370 myń teńge. Eń jas bankrot – 2005 jyly týǵan Astana qalasynyń turǵyny, bereshek somasy 856 myń teńge, - dedi ol ortalyq kommýnıkatsııalar qyzmetinde ótip jatqan baspasóz máslıhatynda. 

Onyń aıtýynsha, bankrottyqqa júginetinderdiń basym bóligi er azamattar. Bankrot dep taný týraly ótinishterdiń 52%-yn er adamdar túsirgen.

- Bereshegi eń kóp bankrot Astana qalasynyń turǵyny boldy. Qaryz somasy 2,1 mlrd teńgege jetken. Búgingi tańda ony bankrot dep taný týraly sheshimge kredıtor shaǵymdanyp, sotta qaralýda jáne bul soma 2007 jyly alynǵan nesıelik qaryzdyń baǵamdyq aıyrmashylyǵyna baılanysty ulǵaıyp ketken, - dedi Seıiljan Ahmetov

Sondaı-aq, ol bankrot dep tanylǵan azamattardyń 5%-y (1342) azamat memleketten ataýly áleýmettik kómek alatynyn aıtty. Al 9 891 adamnyń (44%) 5 jyldan astam ýaqyt boıy tólenbegen qaryzy bolǵan.

Buǵan deıin Atyraý oblysynda jyl basynan beri 252 dármensiz boryshker bankrot dep tanylǵanyn jazǵan edik.