Bank aktsıonerleriniń dıvıdendterine salyq salý úshin zańnamalyq túzetýler ázirlenedi
ASTANA. KAZINFORM — Bank aktsıonerleriniń dıvıdendterine salyq salý úshin zańnamalyq túzetýler ázirlenedi. Bul týraly búgin Úkimet otyrysynda Premer-Mınıstr Oljas Bektenov aıtty.
«Memleket basshysy Salyq kodeksin qabyldaý merzimin kelesi jylǵa aýystyrýdy tapsyrdy. Osyǵan baılanysty Ulttyq ekonomıka mınıstrligi memlekettik organdarmen birlesip, jeke tabys salyǵynyń saralanǵan stavkalaryn belgileý, bank aktsıonerleriniń dıvıdendterine salyq salý jáne arnaýly salyq rejımderin qaıta qaraý jóninde zańnamalyq túzetýler ázirleýi qajet», - dedi Úkimet basshysy.
Premer-Mınıstr Qarjy mınıstrligi osy jyldyń sońyna deıin «Salyqtyq ákimshilendirýdiń ıntegratsııalanǵan júıesi», «Integratsııalanǵan derekqor» jáne «Keden» aqparattyq júıelerin paıdalanýǵa berýdi qamtamasyz etýi kerektigin basa aıtty.
«Memleket basshysy bıýdjettiń kiris bóligin oryndamaý faktilerine jol bermeý qajettigin atap ótti. Bul baǵytta rezervter óte kóp. Biz qarjy mınıstrimen keshe bul máseleni egjeı-tegjeıli talqyladyq. Belsendi sharalar qabyldaý kerek», - dedi ol.
Oljas Bektenov Memleket basshysy keıinnen memlekettik-jekeshelik áriptestik tetigi arqyly qarjylandyrý úshin halyqaralyq qarjy uıymdarynyń qatysýymen tolyq júzege asyrylatyn jobalardyń sapaly pýlyn qalyptastyrýdy tapsyrǵanyn eske saldy. Osyǵan baılanysty ol Ulttyq ekonomıka mınıstrligine Qarjy mınıstrligimen jáne Qazaqstandyq memlekettik-jekeshelik áriptestikti damytý ortalyǵymen birge halyqaralyq qarjy ınstıtýttaryn tarta otyryp, onyń ishinde memleket kepildigimen qaryz tartý arqyly memlekettik-jekeshelik áriptestik jobalaryn daıyndaý qorlaryn qurý máselesin pysyqtaýdy tapsyrdy.
«Prezıdent memlekettik qoldaý sharalary júıesiniń kúrdeli ekenin de atap ótti. Sondyqtan Ulttyq ekonomıka mınıstrligi memlekettik qoldaý sharalarynyń ashyq ári teń qoljetimdi bolýyn qamtamasyz etý úshin olardyń tıimdiligi turǵysynan revızııa júrgizip, bıznesti qoldaý sharalarynyń biryńǵaı tizilimin qalyptastyrsyn», - dedi Premer-Mınıstr.
