Bank aktsıonerleri alatyn dıvıdendterine salyq tóleýi múmkin

ASTANA. KAZINFORM – Qazaqstanda dıvıdend alatyn barlyq adam men uıymdarǵa salyq tóletkizý tetigi engiziledi.

Búgin Májilistiń jalpy otyrysynda depýtat Ermurat Bapı bankterdiń 100 mln teńgege deıin dıvıdend alatyn aktsıonerlerine 10 paıyz, al bir mlrd teńgege deıin paıda tabatyn aktsıonerlerine 15 paıyz salyq salý normasyn usyndy.

- Ortalyq Azııadaǵy eń iri bankter Qazaqstanǵa tıesili. Qazaqstandyq bankterdegi jıyntyq soma 55 trln teńgege jetken, ıanı elimizdiń eki bıýdjetinen artyq. Mine, osy bankter jyl saıyn qojaıyndaryna – aktsıonerlerine mıllıardtaǵan dıvıdend tóleıdi. Іri aktsıonerler 100 mıllıonnyń ústinde dıvıdend alady. Biraq bankterdiń osy dıvıdendteri salyq rejıminen bosatylǵan. Úkimet «qosarlanǵan salyq salý bolmaıdy, sondyqtan olar bosatylǵan» dep jaýap berýi múmkin. Atap aıtqanda, bizdiń eldiń bıýdjeti áleýmettik maqsatqa baǵyttalǵan. El bıýdjetiniń 53 paıyzy áleýmettik sanalady. Endeshe, bankterdiń qoǵam jáne áleýmet aldyndaǵy jaýapkershiligin kóterý maqsatynda dıvıdendterge salyq salý máselesin qarastyrý kerek. Bul – aktsıonerdiń jeke paıdasy, - dedi E.Bapı.

Óz kezeginde Premer-mınıstrdiń orynbasary – Ulttyq ekonomıka mınıstri Serik Jumanǵarın dıvıdendterge salyq salýǵa qatysty naqty usynys bolsa, Úkimet qoldaıtynyn aıtty.

- Ondaı usynys jasalsa, biz qoldaımyz. Bul turǵyda saralaý kerek. Máselen,100 mln teńgege deıin dıvıdendke 5 paıyz, 100 mln-nan bir mlrd teńgege deıin 10 paıyz, sondaı-aq 1 mlrd teńgeden astam somaǵa 15 paıyz shamasyndaǵy kórsetkishti pysyqtaýǵa bolady, - dedi S.Jumanǵarın.

Onyń aıtýynsha, bul talap tek bankterge ǵana emes, sonymen qatar dıvıdend alatyn barlyq adam men uıymdarǵa qatysty bolady.

Budan buryn habarlanǵandaı, Salyq kodeksiniń jańa redaktsııasynda QQS salynatyn aınalymnyń tómengi shegin 40 mln teńge dep belgileý usynylyp otyr.