Bangladeshtegi narazylyq kezinde 6 adam qaza tapty

ASTANA. KAZINFORM – Bangladesh memlekettik qyzmetke kvota júıesine qarsy narazylyq sherýine shyqqan 6 adam qaza tapqannan keıin mektepter men ýnıversıtetterdi belgili bir merzimge jabýdy buıyrdy. Bul týraly Dawn habarlady. 

Seısenbi kúni jaǵdaı shıelenisip, narazylyq bildirýshiler men úkimetti jaqtaıtyn stýdentter bir-birine kirpish jáne bambýk taıaqtarymen shabýyl jasady. Al, polıtsııa mıtıngke shyqqandarǵa kózden jas aǵyzatyn gaz jáne rezeńke oq qoldandy. 

Demonstranttar premer-mınıstr Sheıh Hasına men Joǵarǵy sottyń sabaqqa qaıta oralý týraly úndeýlerin elemedi. 

Aýrýhana dırektory Mohammad Taslımýddın Chıttagongta 3 adam qaıtys bolǵanyn jáne olardan oq jaraqatynyń belgileri tabylǵanyn, port qalasyndaǵy qaqtyǵystar kezinde taǵy 35 adam jaralanǵanyn aıtty. 

Dakkada taǵy 2 adam qaza tapty. Onda stýdenttik toptar bir-birine kirpish laqtyryp, birneshe kósheniń jolyn jaýyp tastap, 20 mıllıon adam turatyn megapolıstegi kólik qozǵalysyna kedergi keltirdi. 

Osy aıda narazylyq bildirýshiler belgili bir toptar úshin memlekettik jumys oryndarynyń jartysynan kóbin saqtaıtyn kvota júıesin toqtatýdy talap etti.