Bangladeshte jumysshylar narazylyǵyna baılanysty 130 fabrıka jabyldy
Bangladesh astanasy Dakka mańyndaǵy Savar jáne Ashýlııa iri óndiris ortalyqtaryndaǵy 130 daıyn kıim fabrıkasy belgisiz merzimge deıin jumysyn toqtatty.
Oǵan jumysshylardyń jalaqysyn kóterýdi talap etip, toqtaýsyz bolyp jatqan narazylyǵy sebep boldy. Kazinform bul týraly qytaıdyń Sınhýa agenttigine silteme jasap habarlaıdy.
Óndiristik polıtsııa basqarmasynyń basshysy Mohammad Sarvar Alam senbi kúni jýrnalısterge jumysshylardyń bir bóligi burynǵysha jalaqynyń keminde 23000 taka /209 AQSh dollary bolýyn talap etip jatqanyn aıtty.
Úkimet seısenbi kúni jalaqyny 56 protsentke kóteremiz dep málimdegenine qaramastan, jumysshylar narazylyǵyn toqtatpady.
Qarsylyq sharalary avtokólik pen fabrıkalardy búldirý sekildi buzaqylyqqa, Dakka men onyń mańyndaǵy jumysshylar men polıtsııa arasyndaǵy qaqtyǵysqa ulasty.
Tigin fabrıkasynda jumys isteıtin áıel Dakkaǵa jaqyn mańdaǵy Gazıpýr okrýgi Konabarı aýdanynda jalaqyny kóterýdi talap etken narazy top pen quqyq qorǵaýshylar qaqtyǵysy kezinde qaza tapty.
