Bangladeshte jastar kóshbasshysy qaza tapqannan keıin elde tártipsizdikter bastaldy

ASTANA. KAZINFORM — Bangladeshte burynǵy premer-mınıstr Sheıh Hasınany bılikten taıdyrǵan jastar qozǵalysynyń kórnekti jetekshileriniń biri qaza tapqannan keıin jappaı tártipsizdikter boldy, dep habarlaıdy VVS.

Sharıf Osman Hadı ótken aptada Dakka qalasynda meshitten shyǵyp kele jatqan kezde betperde kıgen belgisiz adamdardyń shabýylyna ushyrap, oq jaraqatyn alǵan. Ol alǵan jaraqattarynyń saldarynan Sıngapýrda aýrýhanada beısenbi kúni kóz jumdy.

Atys oqıǵasy Bangladesh bıligi byltyrǵy kóterilisten keıin ótetin alǵashqy saılaýdyń kúnin jarııalaǵannan bir kún ótken soń bolǵan. Hadı bul saılaýǵa táýelsiz kandıdat retinde qatysýdy josparlaǵan edi.

Onyń qazasy belgili bolǵan beısenbi kúni astanadaǵy alańǵa júzdegen jaqtastar jınalyp, narazylyq bildirdi.

Keıin demonstranttar Bangladeshtiń bedeldi The Daily Star jáne Prothom Alo gazetteriniń keńselerin qıratty, ǵımarattardyń birine ot qoıyldy.

«Munda júzdegen adam jınalyp, shabýyl jasady», dedi polıtsııa qyzmetkeri BBC Bangla telearnasyna.

Oqıǵa ornyna áskerıler jiberilip, órt sóndirýshiler ǵımarat ishinde qalyp qoıǵan jýrnalısterdi qutqardy.

32 jastaǵy Hadı «Inkılab Mancha» stýdenttik narazylyq tobynyń jetekshi tulǵalarynyń biri boldy jáne ol qazirgi ýaqytta óz erkimen emıgratsııada júrgen Sheıh Hasına panalaǵan kórshi Úndistandy ashyq synǵa alyp júrgen.

Aıta keteıik, Bangladesh bıligi eks-premer-mınıstr Sheıh Hasınanyń banktegi jeke seıfinen 10 kg altyn tárkiledi.