Bangladeshte úkimettiń otstavkaǵa ketýin talap etken sherýde 70-ten astam adam qaza tapty
DAKKA. KAZINFORM – Bangladesh polıtsııasy el Premer-mınıstri Sheıh Hasınanyń otstavkaǵa ketýin talap etip kóshege shyqqan on myńdaǵan sherýshilerdi taratý úshin kózden jas aǵyzatyn gaz ben granata qoldandy. Saldarynan keminde 76 adam, onyń ishinde 13 polıtsııa qyzmetkeri qaza taýyp, ondaǵan adam jaraqat aldy. Bul týraly Al Jazeera habarlady.
Basylymnyń málimetinshe, el astanasy Dakka men soltústiktegi Bogra, Pabna men Rangpýr, sondaı-aq batystaǵy Magýra, shyǵystaǵy Komılla jáne ońtústigindegi Barısal men Fenı qalalarynda jaǵdaı shıelenisip ketken. Shilde aıynyń basynda stýdentterdiń úkimettik jumys oryndaryna kvota júıesin toqtatýdy talap etken narazylyqtar zorlyq-zombylyqqa ulasyp, júzdegen adamnyń ómirin qıǵan soń sherýshiler Hasınanyń otstavkaǵa ketýin talap etti. Olar úkimet otstavkaǵa ketpeıinshe toqtamaımyz dep otyr.
Sherý qaıta jalǵasyp, kósheler adamǵa toldy. Kóptegen aımaqqa zaqym keldi. Dakkanyń Shahbag aýdanyndaǵy iri memlekettik aýrýhana – Bangabandhý Sheıh Mýjıb medıtsınalyq ýnıversıtetine shabýyl jasalyp, birneshe kólik órtendi. Sondaı-aq astananyń Ýttara aýdanynda polıtsııa iri tas joldy jaýyp turǵan júzdegen adamdy taratý úshin kózden jas aǵyzatyn gaz qoldandy.
Sherýshiler bılik partııasynyń júzdegen belsendileri bolǵan aýdandaǵy úılerge shabýyl jasap, áleýmettik qorǵaý keńsesin qıratty. Kýágerlerdiń aıtýynsha, birneshe qoldan jasalǵan jarylǵysh zattar iske qosylyp, atys daýsy estilgen.
Narazylyqtar qazir shamamen 170 mıllıon halqy bar Ońtústik Azııa memleketinde úkimetke qarsy jasalǵan keńirek qozǵalysqa aınaldy. Keıingi aptada kem degende 11 000 adam qamaýǵa alyndy.
