Bangladeshte tigin fabrıkasynan órt shyǵyp, 16 adam mert boldy

ASTANA. KAZINFORM – Dakkadaǵy órt qurbandarynyń sany 16-ǵa jetti. Bul týraly The Daily Star basylymy málim etti, dep habarlaıdy reseılik TASS.

Osyǵan deıin el astanasynyń Rýpnagar aýdanyndaǵy hımııalyq zattar ornalasqan qoıma janyndaǵy tigin fabrıkasy ǵımaratynan shyqqan órtten 9 adamnyń kóz jumǵany habarlandy.

Shuǵyl qyzmetterdiń aldyn ala málimetteri boıynsha, órttiń shyǵýyna óte ýly gazdyń jarylýy sebep bolǵan. Adamdar da sol gazǵa ýlanyp, mert bolǵan.

Hımııalyq zattar ornalasqan qoıma áli janyp jatyr. Ýly zatardyń qaýpine baılanysty qazir órt sóndirýshiler jalynǵa jaqyndaı almaı jatyr.

Osyǵan deıin Pavlodarda er adam áıeli men úsh balasyn órtten qutqaryp, ózi qurban bolǵany týraly jazdyq.