Bangladeshte poıyz avtobýspen soqtyǵysyp, 13 adam ajal qushty
NUR-SULTAN. QazAqparat – Senbi kúni Bangladeshte, Radjshahı oblysynyń soltústik batysynda jolaýshylar poıyzy adam toly avtobýspen soqtyǵysty, dep habarlaıdy QazAqparat.
Dhaka Tribune gazetiniń jazýynsha, apat saldarynan 13 adam qaza taýyp, úsheýi jaraqattanǵan.
Basylymnyń derekterine qaraǵanda, jolaýshylar júrdek poıyzy avtobýspen temirjol ótkelinde soqtyǵysyp, kólikti rels boıymen shamamen 500 metrge deıin súırep ketken.
Avtobýstaǵy 11 jolaýshy oqıǵa ornynda jan tapsyrdy, beseýi aýrýhanaǵa jetkizilgen, sol jerde taǵy eki adam alǵan jaraqat saldarynan kóz jumdy.
Polıtseıler men qutqarýshylar oqıǵa ornyna jetti. Aldyn ala aqparatqa qaraǵanda, keleńsiz jaǵdaı temirjol ótkelindegi qyzmetkerdiń jumys kezinde uıyqtap qalýy saldarynan oryn alǵan.
Eldiń batysynda temirjol qatynasy ýaqytsha toqtatyldy.
