Bangladeshte qoıma jarylyp, 50-ge jýyq adam kóz jumdy
NUR-SULTAN. QazAqparat - Bangladeshtiń Chıttagong qalasynyń mańyndaǵy qoımada bolǵan órt pen kúshti jarylys saldarynan 49 adam qaza taýyp, 450-den astamy jaraqat aldy, dep habarlaıdy QazAqparat BBC News arnasyna silteme jasap.
Órt Sıtakýnda qalasynan shyqty. Bul qala – Chıttagongtegi basty teńiz portynyń júkteri ótetin negizgi pýnkt. Qoımada quny birneshe mıllıon dollarǵa baǵalanǵan taýar bolǵan 4 myńǵa jýyq konteıner saqtalǵan.
Jarylystyń kúshti bolǵany sonshalyq, ol birneshe shaqyrymǵa deıin estilip, jarylys tolqynynan jaqyn mańdaǵy ǵımarattardyń terezeleri synǵan. Kóptegen adamdar iz-túzsiz joǵaldy, sonyń ishinde jarylys aldynda órt týraly habarlaǵan tilshiler de bar.
Dhaka Tribune basylymynyń habarlaýynsha, 2005 jyldan beri Bangladeshtegi óndiristik apattardan 1500-den astam adam qaza tapqan .
