Bangladeshte qyzylshadan 15 adam qaıtys boldy

ASTANA. KAZINFORM — Bangladeshte qyzylsha aýrýy órship tur. El úkimeti juqpaly syrqattan 15 adamnyń kóz jumǵanyn rastady, dep habarlaıdy AZERTADJ.

Syrqattyń órshýi Radjshahı qalasynyń soltústik-batysyna qatty áser etti, onda densaýlyq saqtaý mekemeleri epıdemıologııalyq baqylaýdy kúsheıtip, aýrý jaǵdaılaryn qadaǵalaý jumystaryn arttyrdy.

Bangladesh úkimeti aýrýdyń taralýyn tejeý úshin jedel vaktsınatsııa baǵdarlamasyn iske qosýǵa daıyndalyp jatyr.

Qyzylsha — eń juqpaly derttiń biri, onyń jappaı taralýynan saqtaý úshin halyqtyń 95%-na ekpe salý qajet.

Bangladesh úkimeti aldaǵy jeksenbiden bastap jedel ulttyq vaktsınatsııa naýqanyn bastaıdy. Ekpe egý jumystary eń aldymen joǵary qaýipti aımaqtardan bastalady.

Buǵan deıin QR Densaýlyq saqtaý mınıstri Aqmaral Álnazarova qyzylsha dendep turǵan kezeńde vaktsınatsııanyń qaýipsizdigi men tıimdiligin atap, ata-analardy balalaryn qorǵaýǵa shaqyrǵan edi. Mınıstr qyzylsha «qarapaıym balalar ınfektsııasy» emes dep, ol pnevmonııaǵa, nerv júıesiniń zaqymdanýyna jáne basqa da kúrdeli saldarǵa ákelýi múmkin ekenin eskertti.