Bangladeshte qyzylsha indetinen 1 147 adam kóz jumdy
ASTANA. KAZINFORM — Bangladeshte qyzylsha indeti órship, 2026 jyldyń naýryz aıynyń ortasynan beri 1 147 adam kóz jumdy. Kúdikti jaǵdaılardyń sany 202 myńnan asyp, qaıtys bolǵandardyń 94%-yn bes jasqa tolmaǵan balalar quraıdy. Dúnıejúzilik densaýlyq saqtaý uıymynyń málimetinshe, elde bıyl álemdegi eń iri qyzylsha órshýi tirkelip otyr, dep habarlaıdy Reuters.
DDSU deregine sáıkes, 9 qazanǵa deıin tirkelgen 202 myń kúdikti jaǵdaıdyń 22 myńy zerthanalyq tekserý arqyly rastalǵan. Mamandar indettiń órshýin vaktsınatsııa deńgeıiniń tómendeýimen jáne medıtsınalyq kómektiń balalarǵa ýaqytynda jetpeýimen baılanystyrady.
2025 jyly Bangladeshte qyzylshaǵa qarsy ekpeniń alǵashqy dozasymen qamtý 90%-ǵa, ekinshi dozasymen qamtý 86%-ǵa deıin tómendegen. Al DDSU indettiń keń taralýyna jol bermeý úshin vaktsınatsııamen qamtý deńgeıi 95%-ǵa jetýi qajet ekenin atap ótedi.
Kóktemde júrgizilgen shuǵyl vaktsınatsııa naýqany kezinde 20 mıllıonǵa jýyq bala ekpe alǵanymen, baǵdarlama mıllıondaǵan balany qamtı almaǵan. Buǵan balalar týraly derekterdiń tolyq bolmaýy, daıyndyqtaǵy kemshilikter jáne shalǵaı eldi mekenderge medıtsınalyq qyzmetkerlerdiń jete almaýy sebep bolǵan.
Reuters zerttegen derekterge sáıkes, saıası turaqsyzdyq, medıtsına qyzmetkerleriniń ereýilderi men vaktsına jetkizýdegi kidirister de ekpe baǵdarlamasynyń álsireýine áser etken.
Mamandar Bangladeshtegi jaǵdaıdy basqa elder úshin eskertý dep baǵalap, vaktsınatsııa deńgeıin kóterý men densaýlyq saqtaý júıesin nyǵaıtýdyń mańyzyn atap ótti.
Eske sala keteıik, Nıý-Iork shtatynyń gýbernatory Ketı Hokýl qyzylsha aýrýynyń taralýyna baılanysty tótenshe jaǵdaı jarııalady.
