Bangladeshte qyzylsha indeti órship, myńǵa jýyq bala qaıtys boldy
ASTANA. KAZINFORM – Bangladeshte naýryz aıynyń ortasynan beri jalǵasyp kele jatqan qyzylsha indeti kezinde osy aýrýǵa kúdikti bolyp qaıtys bolǵan balalar sany 999-ǵa jetti, dep habarlaıdy Anadolý agenttigi.
Bangladesh Densaýlyq saqtaý mınıstrligi janyndaǵy Densaýlyq saqtaý bas basqarmasy elde órship turǵan qyzylsha indetine qatysty málimdeme jasady.
Málimdemege sáıkes, keshe kúngi jaǵdaı boıynsha jyl basynan beri qyzylshaǵa kúdikti bolyp qaıtys bolǵan balalar sany 999-ǵa jetken.
Sońǵy bir aıda osy aýrýdan 100-den astam bala qaıtys bolǵan elde naýryz aıynan beri qyzylshaǵa kúdikti 166 myńnan astam jaǵdaı tirkelgen.
Naýryzda bastalǵan shuǵyl vaktsınatsııa naýqanynyń alǵashqy kezeńinde 6 aıdan 5 jasqa deıingi balalarǵa basymdyq berildi. Keıin vaktsınatsııa úderisi birtindep keńeıtilip, eldiń barlyq turǵyndaryn qamtýǵa baǵyttaldy.
Pnevmonııa men entsefalopatııaǵa ákelýi múmkin qyzylsha – vaktsınatsııa arqyly aldyn alýǵa bolatyn álemdegi ólim-jitimniń negizgi sebepteriniń biri.
Buǵan deıin AQSh-ta qyzylsha aýrýynyń taralýy sońǵy 35 jyldaǵy eń joǵary deńgeıge jetkeni habarlanǵan.
Aıta keteıik, Batys Qazaqstan oblysynda qyzylshamen aýyrǵan naýqastar sany 300-ge jýyqtaǵanyn jazdyq.
Al Túrkistan oblysynda qyzylsha juqtyrǵandar sany artqan, sebebi naýqastardyń 57 paıyzy ekpe almaǵan.
