Bangladeshte kıim fabrıkasynyń opyrylyp qulaýynan qaza tapqandar sany 1035 adamǵa jetti
ASTANA. 10 mamyr. QazAqparat -Bangladeshte kıim tigetin fabrıka men saýda núkteleri ornalasqan ǵımarattyń opyrylyp qulaýy saldarynan qaza tapqan adamdardyń sany 1035-ke jetti.
Bul týraly France Presse qaıǵyly oqıǵa ornynda adamdardy izdeý sharalaryna jumyldyrylǵan áskerı bólimsheniń jetekshisi general Sıddıkýlıa Alama Sıkderaǵa silteme jasap habarlady.
Jumaǵa qaraǵan túnde bılik ókilderi qaza tapqandardyń sany myńǵa jetkendigin málim etken bolatyn. Degenmen búgin tańerteń qaıta jandanǵan izdeý jumystary barysynda áskerı qyzmetshiler úıindiler astynan taǵy 35 adamnyń múrdesin tapty. ázirshe iz-tússiz joǵalǵandardyń sany qansha ekendigi týraly naqty aqparat joq. Úıindilerdi arshý jumystary jalǵasýda. Bılik oryndary qaza tapqandar sany budan da arta túsý múmkindigin joqqa shyǵarmaıdy.
Esterińizge sala keteıik, Dakkıdegi Rana Plaza kesheni 24 sáýir kúni qulaǵan bolatyn. Ǵımaratta kıim tigetin 4 fabrıka, bank jáne kóptegen dúkender bolǵan. Ǵımarat ıesi Muhammed Sohel Rana 28 sáýir kúni Úndistanmen shekarada qolǵa túsken edi. Atalǵan is boıynsha taǵy 8 adam tutqyndaldy.
Jergilikti bıliktiń habarlaýynsha, ǵımarattyń opyrylyp qulaýyna tóbege ornalasqan 4 elektr generatorynyń jumysy sebep bolǵan. Olar týyndatqan dirildi, ǵımarat ishindegi myńdaǵan tigin mashınasynyń jumysy odan ary kúsheıtip jibergen. Nátıjesinde dál osy diril ǵımarattyń opyrylyp qulaýyna túrtki bolǵan.
