Bangladeshte er adam jolaýshylar ushaǵyn basyp almaq boldy
ASTANA. QazAqparat - Jeksenbi kúni Bangladeshte belgisiz er adam jergilikti áýekompanııanyń Boeing 737 jolaýshylar ushaǵyn basyp almaq boldy. Kóp uzamaı kúdiktiniń kózi joıyldy, dep habarlaıdy QazAqparat VVS saıtyna silteme jasap.
Oqıǵa Biman Bangladesh avıakompanııasynyń ushaǵy Chıttagong qalasynyń áýejaıyna qonǵan kezde bolǵan. Quqyqqorǵaý organdary dereý jetip, áýejaı ǵımaraty qorshaýǵa alynǵan.
Bortta bolǵan 148 jolaýshy men eki ekıpaj múshesi din-aman evakýatsııalandy. Er adam ushaqty nelikten aıdap áketpek bolǵany ázirge belgisiz.
Aldyn ala málimet boıynsha, ol psıhıkalyq aýrýǵa shaldyqqan jáne Bangladeshtiń premer-mınıstrimen sóılestirýdi talap etken.
«Biz ony tutqyndamaq boldyq, ózdigimen berilýge kóndirýge tyrystyq. Biraq ol bas tartty. Kózin joıýǵa týra keldi. Onyń qarýy boldy», - dedi jýrnalısterge ofıtser Motıhýr Rahman (Motiur Rahman).
