Bangladeshte eki jol apatynan 16 adam qaza tapty
ASTANA. KAZINFORM – Bangladeshte juma kúni bolǵan eki jol-kólik oqıǵasynan 16 adam qaza taýyp, taǵy 29 adam túrli jaraqat aldy, dep habarlaıdy Sınhýa.
Sılhet okrýgi polıtsııasynyń sýperıntendanty Choýdhýrı Md Zaber Sadektiń málimetinshe, el astanasy Dakkadan soltústik-shyǵysqa qaraı shamamen 240 shaqyrym jerde ornalasqan Sılhet aımaǵynda eki jolaýshylar avtobýsy betpe-bet soqtyǵysqan.
Jol apatynan segiz adam oqıǵa ornynda kóz jumdy. Taǵy bir adam aýrýhanada alǵan jaraqattarynan qaıtys boldy.
– Apat saldarynan taǵy 14 adam jaraqat aldy. Qazirgi málimet boıynsha, olardyń ekeýiniń jaǵdaıy aýyr, – dedi polıtsııa ókili.
Ekinshi jol apaty Dakkadan soltústik-batysqa qaraı shamamen 197 shaqyrym jerde ornalasqan Bogra okrýginde boldy. Jergilikti órt sóndirý jáne azamattyq qorǵanys qyzmetiniń ókili Md Shahıdýl Islamnyń málimetinshe, oqıǵadan jeti adam qaza taýyp, taǵy 15 adam jaraqat alǵan.
Aldyn ala málimet boıynsha, avtobýs júrgizýshisi jyldamdyqty shamadan tys arttyryp, kólik tizginine ıe bola almaı qalǵan. Saldarynan avtobýs jol jıeginde turǵan jumysshylar tobyn qaǵyp ketken.
Jaraqat alǵandardyń barlyǵy shuǵyl túrde jergilikti aýrýhanalar men klınıkalarǵa jetkizildi.
Aıta keteıik, Ýgandadaǵy jol apatynan 14 adam qaza tapqany habarlandy.
