Bangladeshte 18 mıllıon adam jumys izdep júr
ASTANA. KAZINFORM – Búginde Bangladeshte jastardy jumyspen qamtýda kúrdeli másele aınalǵan. 18 mıllıonǵa jýyq adam belsendi túrde jumys izdeýge kiristi, dep habarlaıdy Kazinform agenttiginiń halyqaralyq sholýshysy.
Sarapshynyń aıtýynsha, Bangladeshte memleket menshigindegi nemese sýbsıdııalanatyn 47 ýnıversıtet, sonymen qatar 105 jeke ýnıversıtet jáne 2 halyqaralyq ýnıversıtet bar. Eldegi stýdent sany – 2,8 mıllıonǵa jýyq. Bangladesh Ulttyq ýnıversıtetinde oqý aqysy jylyna nebári 9 dollar. Alaıda sheteldikter úshin bul shamamen 1 myń dollar turady.
«Jalpy, Bangladeshte 18 mıllıonǵa jýyq adam jumys izdep júr. Jastardyń 40 paıyzǵa jýyǵy jumyssyz. Biraq stýdentter úshin jumyssyzdyqtyń ózindik erekshelikteri bar. Qalypty jaǵdaıda, joǵary bilim myqty kadrlardy irikteýde áleýmettik saty bolyp sanalady. Biraq eldegi júz elý joǵary oqý ornynda 2,8 mıllıon stýdent bolsa, olardyń barlyǵyna laıyqty jumys orny bolmaýy múmkin. Onyń ústine memleketke jumys isteıtinderdiń 30 paıyzy jekelegen áleýmettik top ókilderi úshin saqtalǵan bolsa», - deıdi halyqaralyq baqylaýshy.
Eske salaıyq, Bangladeshtegi stýdentterdiń jappaı narazylyǵy maýsym aıynyń sońynda bastalǵan edi. Bul eldi 2009 jyldan beri basqaryp kelgen premer-mınıstr Sheıh Hasınanyń otstavkaǵa ketýine ákeldi. Keıinirek Hasınanyń Ulybrıtanııadan baspana suraǵany belgili boldy.
5 tamyzda elde ýaqytsha úkimet qurylyp, parlament taratyldy. Bir kúnnen keıin Nobel syılyǵynyń laýreaty, professor Muhammed ıÝnýs ýaqytsha úkimetti onyń bas keńesshisi retinde basqarýǵa kelisti.
