300 adam mert bolǵan mıtıng: Bangladesh premer-mınıstri otstavkaǵa ketti

ASTANA. KAZINFORM – Bangladesh armııasynyń qolbasshysy el premer-mınıstri Sheıh Hasına birneshe aptaǵa sozylǵan qandy demonstratsııalardan keıin otstavkaǵa ketkenin habarlady. Onyń kómekshisi Hasına Dakkadan tikushaqpen ushyp ketkenin aıtty, dep jazady Aljazeera.

Armııa qolbasshysy general Vaker-Ýz-Zaman halyqqa joldaýynda Bangladeshti endi ýaqytsha úkimet basqaratynyn málimdep, halyqty sabyrǵa shaqyrdy.

Myńdaǵan adam jeńisti merekeleý úshin kóshege shyǵyp, kópshiligi premer-mınıstrdiń resmı rezıdentsııasyna basyp kirdi. Ótken aıda úkimettik jumys kvotalaryna baılanysty bastalǵan sherýler búkil eldegi tolqýlarǵa ulasty.

Hasına birneshe apta boıy bılik basýǵa tyrysqan narazylyq kezinde 300 adam qaıtys bolǵannan keıin otstavkaǵa ketý týraly sheshimge kelgen.

Eldi jıyrma jylǵa jýyq basqaryp kele jatqan premer-mınıstr búgin, dúısenbide áskerı tikushaqqa otyryp, elden shyǵyp ketken. Jeksenbi kúni túnde bolǵan jantúrshigerlik zorlyq-zombylyq 100-ge jýyq adamnyń ómirin qıdy jáne komendanttyq saǵat jarııalandy.

Qaza tapqandar arasynda 13 polıtsııa qyzmetkeri bar. Olar el astanasy Dakkadan soltústikke qaraı 100 shaqyrym jerde ornalasqan Sıradjgandj qalasyndaǵy polıtsııa bólimshesine jasalǵan shabýylda qaza tapty.